Kreu Vetëvendosje-s, Visar Ymeri, i shoqëruar nga policia e Kosovës ka arritur në gjykatën themelore për rastin “Kamishi”.
Por sipas VV-së, ky akt është një “arrestim” i kryetarit Imeri, ndërsa procesin gjyqësor e ka cilësuar si të montuar.
“Proceset e montuara gjyqësore ndaj Lëvizjes Vetëvendosje! Nuk po ndalen dhe janë intensifikuar kohëve të fundit. Arrestimi i vazhdueshëm i kryetarit të subjektit më të madh opozitar, konfirmon raportet ndërkombëtare që Kosovën e kanë shpallur vend me sistem gjysmë të konsoliduar autoritar. Prej se e kemi në pushtet këtë koalicion, dhuna dhe përndjekjet politike janë bërë metodë qeverisëse në Kosovë”, thuhet në reagimin e VV-së.
Dhe në fakt, Imeri ishte ndër të vetmit në kupolën e Vetëvendosje-s që kish mbetur pa u shoqëruar në polici. Pothuajse të gjithë krerët e kësaj partie, përfshirë dhe deputetët, janë familjarizuar me organet policore, deri dhe qelitë e burgut apo prangat. /tesheshi.com/
