Kryeministri hungarez ka shfrytëzuar një konferencë të përbashkët shtypi në Budapest me kancelarin austriak, Christian Kern, për të deklaruar se vendi i tij nuk dëshiron qoftë edhe një emigrant të vetëm.
“Hungaria nuk ka nevojë edhe për një emigrant të vetëm që ekonomia të punojë, që popullata ta mbajë veten, apo që vendi të ketë një të ardhme.”
Orban është shprehur që në krye të herës kundër një skeme të BE-së për shprëndarjen e refugjatëve sipas një kuote të detyrueshme.
“Kjo është arsyeja pse nuk ka nevojë për një politikë të përbashkët europiane për emigracionin,” ka vazhduar Viktor Orban në konferencën e shtypit. “Kush ka nevojë për emigrantë mund t’i marrë, por mos na i bëni të detyrueshëm ne; nuk kemi nevojë për ta.”
I njohur për qëndrimin kundër emigrantëve, ai nuk është kursyer në fjalët kundër tyre, duke u shprehur se çdo emigrant është një kërcënim për sigurinë publike, e përbën rrezik për terror.
“Për ne, emigracioni nuk është një zgjidhje, por një problem…, jo një ilaç, por një helm. Nuk kemi nevojë për të dhe nuk do ta përtypim.”
Në nisje të tetorit do të mbahet një referendum në Hungari për pjesëmarrjen në skemën e BE-së për shpërndarjen e refugjatëve. Po ashtu ka tanimë dhe një ankesë ligjore për propozimin mbi kuotat e shpërndarjes. /tesheshi.com/
