Të gjithë e dimë se veset e duhanpirjes dhe të alkoolit janë të tmerrshme për organizmin tonë dhe jemi tërësisht të vetëdijshëm për faktin se sa më gjatë të vijojmë t’i konsumojmë, aq më shumë dëmtojmë organizmin. Tani shkencëtarët kanë forcuar konceptin e rrezikut nëpërmjet një studimi të ri, i cili është realizuar nga University of Southern California në Los Angeles.
“Për momentin nuk kemi ende asnjë kurë për Alzheimerin, ndaj është shumë e rëndësishme që përqëndrohemi në parandalimin e sëmundjes”,- shpjegon mjeku Kevin King në një artikull të publikuar në revistën shkencore Radiology.
Me sa duket, ndikimi më i madh i këtyrë ‘drogave’ vdekjeprurëse, është në materien gru, zonën e trurit e cila na ndihmon të imagjinojmë dhe të elaborojmë informacionet dhe kujtimet, përveç se ti rikthejmë ato në kujtesë kur na duhen. Sipas kërkuesve, të cilët drejtohen nga profesor King, rreziku kryesor është ai i zhvillimit të sëmundjeve të rënda, të cilat ndikojnë në mënyrë të drejtpërdrejtë në tru, aq sa mund të krijojnë edhe simptoma të ngjashme me sëmundjen e Alzheimerit.
Në kërkim kanë marrë pjesë 1600 persona, ku secilit prej tyre u është kërkuar të përmbushin një formular dhe të ndajnë me kujdesin më të madh ‘stilin e tyre të keq’ të jetesës, përfshirë edhe veset e duhanpirjes dhe të konsumit të alkoolit.
Pas 7 vitesh, grupi i pjesëmarrëse, të gjithë nën moshën 50 vjeçare, iu janë nënshtruar një rezonance magnetike dhe një testi të matjes së inteligjencës. Në mënyrë të veçantë, tre kanë qenë zonat e trurit të analizuara në mënyrë të thelluar nga ana e mjekëve: hipokampi, prekunea dhe membrana cingulate, të treja zona të rëndësishme për kapacitetin e kujtesës, përveç se të përfshira në aktivitetin vizual, refleksionin personal dhe kuptimin e rrezikut. Veset e alkoolit dhe të duhanpirjes kanë një ndikim shumë të madh pikërisht në këto zona të trurit dhe si pasojë (gjithmonë sipas rezultateve të testit) në aftësinë e njerëzve për të kujtuar të dhëna dhe për të përpunuar informacione.
“Në të ardhmen do të mund të jemi në gjendje t’u ofrojmë pacientëve informacione më të hollësishme në lidhje me faktorët e rrezikut të këtyre dy veseve, impaktin e tyre në mirëqenien e trurit, përmes një rezonance magnetike”,- përfundon mjeku./tesheshi.com/
