Blaugranasit do të luajnë në finalen e Kupës së Mbretit për të tretën herë me radhë. Ndeshja e dytë gjysmëfinale ndaj Valencia ishte thjesht një formalitet i kaluar me sukses.
Në një stadium thuajse të boshatisur, me formacione eksperimentale, sfida ndërmjet Valencias dhe Barcelonës përfundoi 1-1. Fitorja dërrmuese 7-0 e katalanasve në takimin e parë e kishte përcaktuar fituesin, çka e bënte takimin e dytë të pakuptimtë.
Sa i përket ndeshjes së mbrëmshme, Negredo shënoi për vendasit në minutën e 39-të, ndërsa i riu Kaptoum e barazoi rezultatin në të 84-ën.
Kështu, skuadra e Luis Enrique-s mbetet e pamposhtur edhe pas 29 ndeshjeve, duke e thyer rekordin e Pep Guardiola-s, me 28 takime pa humbje.
Barcelona me shumë mundësi do të luajë kundër Seviljes në finale, ndërsa andaluzianët e kanë fituar 4-0 ndeshjen e parë ndaj Selta Vigos. Gjysmëfinalja e dytë mes Selta Vigos dhe Seviljes luhet sonte, në 20:30. /tesheshi.com/
