Ende në Angli vazhdojnë të jenë skeptikë mbi mundësitë që një skuadër si Lestër Siti të fitojë kampionatin. Çdo javë pritet që Lestëri të rrëshqasë, sipas logjikës më të thjeshtë të futbollit, e për, më shumë, sipas logjikës së futbollit të milionave.
Por vetë Lestëri po provon të kundërtën. Nëntë ndeshje kanë mbetur gjer në fund të kampionatit, ndërsa skuadra ka fituar atë të djeshmen ndaj Uotfordit. Nëntë takime finale e presin Lestërin, të shkëputur tanimë me pesë pikë nga Totenhemi, ndjekësi më i afërt.
Fitorja 0-1 e Lestërit dje ndaj Uotfordit në transfertë qe e mundimshme. Golin e vetëm të takimit do ta shënonte algjeriani Mahrez në minutën e 56-të. Tre pikët e fituara do të ishin mjaft të çmuara, duke patur parasysh se derbi i Londrës mes Totenhemit dhe Arsenalit kishte përfunduar 2-2.
“Tifozët ëndërrojnë dhe ne punojmë,” ka deklaruar pas ndeshjes Ranieri, trajneri italian i Lestërit. “U thashë lojtarëve të mi, çdo ndeshje është një finale.”
Kalendari i Lestërit parashikon një fund të vështirë për ta, me tre sfida në maj të jashtëzakonshme. Njukasëlli, Kristëll Pallasi, Sauthemptoni, Sandërlendi, Uest Hemi, Suonsi Siti, Mançester Junajtedi, Evertoni e Çelsi janë kundërshtarët e ardhshëm të skuadrës më surprizuese në Angli në vite.
“Çdo ndeshje në Premier League është një betejë. Pesë pikë nuk janë asgjë,” kanë qenë fjalët e teknikut italian.
“Ne duam të vazhdojmë të luftojmë, dhe mendja jonë është te Njukasëlli,” do të vinte pikën ai, tejet i kënaqur me fitoren e së shtunës. /tesheshi.com/
