Vladimir Putin dhe Rexhep Tajjip Erdogan kanë komunikuar sot për herë të herë të parë me njëri-tjetrin pas shtatë muajsh, që prej rrëzimit të avionit luftarak rus në nëntorin e 2015-tës.
Biseda e tyre telefonike i jep fund krizës së thellë mes dy vendeve pas atij incidenti, duke shtruar rrugën për rikthimin e marrëdhënieve tradicionale.
Burime nga presidenca turke folën për një bisedë të ngrohtë mes krerëve të dy shteteve, e për shprehje ngushëllimi nga ana e Putinit për jetët e humbura në sulmin e fundit terrorist në Stamboll.
Pas bisedës ka pasuar një deklaratë me shkrim, ku theksohet vendosmëria e dy udhëheqësve për përtëritjen e marrëdhënieve reciproke.
Putini mësohet të ketë thënë se dy vendet duhet të hapin një faqe të re për ta kapërcyer krizën. “Si fuqi të mëdha rajonale, Rusia dhe Turqia kanë shumë për të bërë,” ka vënë në pah ai.
Ndërsa Erdogani i është përgjigjur me fjalët, “Ne synojmë të ndërmarrim hapa të rëndësishëm në nivel dypalësh dhe rajonal. Ne kemi për ta forcuar akoma më tepër bashkëpunimin me Rusinë.”
Putini dhe Erdogani kanë rënë dakort që të takohen kokë më kokë në shtator, në takimin e G20-tës në Kinë.
Kremlini lajmëroi pak pas bisedës telefonike se Putini urdhëroi rifillimin e marrëdhënieve tregtare me Turqinë. Gjithashtu, ai ka urdhëruar heqjen e kufizimit të udhëtimit për qytetarët rusë që duan të vizitojnë Turqinë. /tesheshi.com/
