Figura e Ho Shi Minit mbetet qendrore në Vietnam, ndërsa vendi përkujtoi dje 125-vjetorin e lindjes së tij.
Vietnamezët e kujtojnë ende me dashuri atë, duke e quajtur udhëheqës legjendar, themelues të Vietnamit modern. Të hënën pati një ceremoni të përmasave të mëdha në Hanoi, ku fjalën kryesore e mbajti kreu i partisë komuniste, Ngujen Phu Trong, i cili me një zhargon tipik komunist ngriti lart figurën e Ho Shi Minit.
“Ai nuk ishte vetëm një udhëheqës i madh revolucionar dhe hero i çlirimit kombëtar, por qe gjithashtu një figurë ndërkombëtare gjenialiteti i të cilit si një strateg ushtarak është duartrokitur në tërë botën. Ai i solli famë kombit, popullit vietnamez dhe vendit. Ai ishte një komunist internacional shembullor, një mik i ngushtë i të gjithë popujve që kanë luftuar për paqe, pavarësi, demokraci dhe përparim shoqëror anekënd botës,” tha në fjalën e tij drejtuesi i lartë komunist.
Trong e përshkroi epokën e Ho Shi Minit si periudhën më të lavdishme të historisë së Vietnamit, ngaqë ishte një erë pavarësie, lirie dhe socializmi.
Ho Shi Mini lindi më 19 maj 1890, dhe shërbeu si kryeministër e president i Vietnamit. Ai ndërroi jetë në shtator të 1969-s, por ende është i pranishëm fort në jetën e vietnamezëve.
Ceremonitë përkujtimore për ditëlindjen e Ho Shi Minit ngjajnë si dy pika uji me ato të tillat të zhvilluara për diktatorin Enver Hoxha pas vdekjes së tij. I njëjti dekor, të njëjtat fjalë, të njëjtat festime.
Vietnami mbetet nga të paktat vende në botë ku komunizmi mbijeton ende. /tesheshi.com/
