Partitë e vogla rreth PD-së, apo më saktë njerëzit që identifikohen me to, duhet të jenë ndjerë shumë të mikluar të hënën pasdite, teksa kanë qenë të ftuar për të biseduar me Zëvëndësndihmës Sekretarin amerikan të Shtetit, Hoyt Brian Yee, lidhur me zgjidhjen e ngërçit politik.
Padyshim që një adrenalinë politike i ka përshkuar ato çaste me ndjesinë se janë dhe ato që vendosin, që vlejnë për diçka në këtë botë të madhe e të trazuar. A nuk është PAA-ja e Dukës partia që me një ankimim në KQZ po tenton të hedhë në erë 18 qershorin? Kujtojmë se Nano i quajti dikur Laço-parti, duke iu referuar Bashkimit Liberal Demokrat të të ndjerit Teodor Laço; por së paku ajo parti, e cila doli nga PSD-ja e Gjinushit fill pasi Laço nuk pranoi shkëputjen nga Berisha me shkak referendumin kushtetues të ‘94-ës, duke qenë se ishte ministër i tij, i kishte dhe dy-tre emra të tjerë të njohur; ndërsa këta të sotmet, nga e djathta e nga e majta bashkë, nuk u njihet askush veç atyre që i kanë themeluar, më saktë regjistruar në gjykatë, e që janë gjithashtu dhe kryetarë të tyre të padiskutueshëm në asnjë rast.
E dini se kush është nr. 2 i republikanëve pas Fatmir Mediut? Ah, ka qenë Alfred Deshati, i kaluar tashmë në LSI, gjithsesi një emër që nuk i thoshte asgjë publikut për ndonjë peshë politike e diç më tepër.
Po Dash Shehi kë ka në partinë e tij emër të njohur pasues, ndonjë nënkretar a sekretar?
Po PBDNJ-ja e Dules, që për më tepër është parti tradite me 25 vjet e kusur jetë? Kush është një emër tjetër veç Dules aty, gjithnjë i njohur?
Po Ndoka, Ngjela, Milo, ç’emra kanë pas tyre?
Mbahet ende Gjinushi, që tashmë po përpiqet ta japë dhe “me qera”partinë e tij Socialdemokrate, duke futur në lista emra si Tom Doshi, Ylli Ziçishti apo Mirela Ferracuku, kjo e fundit e ardhur nga partia e Mark Frrokut i cili tashmë ndodhet pas hekurave.
Ndërsa në partinë e Laços nr. 2 ishte Arian Starova, në postin e Sekretarit të Përgjithshëm, njeri me sharm të pëlqyeshëm politik dhe intelektual. Në partinë e tij ishte dhe Shaqir Rexhvelaj, një emër i njohur i artit televiziv, si dhe gazetari Halil Rama. Pra, ishte një parti ku e ku me këto të sotmet, të cilat gjajnë si vemje në përpjekjen për të mbijetuar duke u ngjitur pas të mëdhave, që dhe këto të fundit nuk kanë mundur t’i shqisin nga trupi.
Vetë Rama grumbulluoi rreth vetes një vargan sosh prej tyre gjatë viteve të opozitës, ku krerët përkatës që mprehën dhëmbët për ndonjë post, mbetën të zhgënjyer nga “mosmbajtja” e premtimeve të të “gjatit”, siç i thonë me qesëndi, me ngjitjen në pushtet. /tesheshi.com/
