VËZHGIM/ Çfarë ofron Teatri Kombëtar i Kosovës dhe nga se “vuan”?!

Prishtinë – Ndërkohë që në Teatrin Kombëtar të Kosovës (TKK) vazhdojnë të jepen shfaqje prej më të ndryshmëve, nga dita në ditë, interesimi i qytetarëve pothuajse është jashtëzakonisht i vogël.

Ndërkaq, të vetmet shfaqje, “prapa” së cilëve qëndrojnë regjisorë apo aktorë të njohur, janë ato që i mbushin sallat.

Siç dihet, drejtuesit e TKK-së ka kohë që e kanë publikuar programin artistik për secilin muaj veç e veç, ku, padyshim, jepen relativisht shumë premiera.

Bazuar në këtë radhitje, të premten është dhënë shfaqje baleti, e quajtur Baleti “Othello” e koreografit Pëllumb Alagliu, ndërsa sot në ditën e fundit të muajit shkurt pritet që Teatri Kombëtar mos t’i zë vizitorët – pasi që në skenë do të dalë aktori Vedat Bajrami me Stand-up komedinë e tij, me të cilën, edhe më parë e ka mbushur teatrin si kurrë më parë.

Njëri nga dramaturgët kosovarë, Naser Shatrolli, gjatë një bisede për portalin TeSheshi thotë se  komedia është ilaç i publikut, ndërsa thekson se veçanërisht, siç thotë ai, komedia e keqe zgjon interes për shikueshmëri.

“Sa më e keqe aq më shumë sukses”, thotë ai.

Sipas tij, mesazhi më i mirë është kur publiku ngopet me amatorizëm.

“Poqese arrin këtë ndjesi me e nxjerr shfaqja, atëherë shfaqja ja ka arrit qëllimit. Pra, të bësh gjëra të këqija në skenë, kjo është provokim dhe mesazh i pranueshëm”, nënvizon Shatrolli.

Ai thotë, se megjithatë shikuesit duhet të ndahen në dy kategori, shikues të mirë dhe të këqij.

“Shikues të këqij ka, shumë të mirë pak. Kjo shumicë është duke e tradhtuar teatrin se nuk po gjen shfaqje aq të këqija për t`i ngopur apetitet e tyre. Do ketë rënie edhe më tej sepse nuk do kemi shfaqje të dobëta mjaftueshëm”, thekson ai.

Sipas këtij dramaturgu, spektatori i teatrit modern nuk ekziston, ngase, siç thotë ai, publiku plaket tok me teatrin.

“Është mplakur teatri shqiptar. Publiku nuk e do më atë se nuk ka magji brenda muresh. Kështu që preferoj të lidhemi me televizionet drejtpërdrejt që të kenë mundësi nga shtëpia ta shikojë teatër publiku”, thekson ai.

Njëri nga moderatorët më të njohur në Kosovë, Agron Krasniqi, gjatë një bisede për portalin TeSheshi thotë se sa më shpesh që shkohet në teatër, aq më shumë ngritët vetëdija për artin.

“Teatrin e vizitoj, jo edhe aq shpesh, por jo për “fajin” tim, por të vetë atij institucioni”, thotë ai, duke shtuar se megjithatë i ka parë shumicën e shfaqjeve të cilat, siç thotë ai, mendohet se kanë vlera dhe e kanë merituar të jenë në repertorin e Teatrit.

“Por kohët e fundit ose më saktë disa vitet e fundit, shumëçka nuk ka funksionuar aty. E para, nuk janë shfaqjet që e kanë vendin aty, e dyta edhe ndonjë që mund të jetë nuk e ka publicitetin e duhur që duhet ta ketë një shfaqje, në këtë kohë kur njerëzit janë të “bombarduar” me informata dhe reklama të ndryshme. Pra, mundësia për të promovuar punën është më e madhe se kurdoherë, por nuk shfrytëzohen këto mundësi. Bile, nuk e di nëse Teatri Kombëtar i Kosovës ka një profil në rrjetet sociale, ku do të komunikonte me shikuesit e vet”, thekson ai.

Por, pothuajse jashtëzakonisht i rregullt në premiera dhe në dhënien e shfaqjeve të ndryshme është shkrimtari Adil Olluri.

“Gjatë vitit 2014, që e lamë pas, nuk kemi pasur një repertor që mund të lavdërohet në  Teatrin Kombëtar të Kosovës. Përjashto, dy ose tri shfaqje, shumica prej tyre kanë qenë nën mesatare, madje kishte edhe shfaqje nën çdo nivel si “Dëshmitari X” me regji të Selami Terakut”, thotë ai për portalin TeSheshi.

Olluri shprehet i bindur se gjatë vitit të kaluar shfaqja që është realizuar më së miri është “Shoping and fucking”, që është bërë nga regjisori Fatos Berisha.

Siqoqoftë, drejtuesit e Teatrit Kombëtar të Kosovës tashmë kanë publikuar repertorin e muajit mars, ku siç shihet, brenda këtij muaji do të jenë dy premiera.

Shfaqja me regji të Elmaze Nurës “Trojanët”, që do të jepet me 10 mars është premiera e parë që do të prezantohet në këtë muaj, ndërsa “Palaçot binjakë”, e realizuar nga Mentor Zymberaj, është premiera e dytë, e cila do të shfaqet me 27 mars./TeSheshi/