Përfaqsues nga PS dhe PD u takuan me të deleguar nga komisioni i Venecias, parë të që prej javësh është bërë “çështje dite” nga opozita: vettingu i politikës.
Mazhoranca i është drejtuar “për ndihmë” Komisionit të Venecia, pasi pretendon se ky lloj vettingu që kërkojnë rivalët politikë duhet të bëhet vetëm nga SPAK, si institucion i ri i reformës në drejtësi. Ndërsa opozita kërkon një tjetër formë, por pa e specifikuar se si. Ndaj, qeveria ka luajtur kartën e saj të tipit: pyesim Venecian. Nëse ajo thotë “po”, atëherë ne jemi të gatshëm t’i bashkangjitemi nismës së opozitës.
Një përfaqsi e Venecias mbërriti në Tiranë dhe këtë të hënë ndërrmori takime me dy palët, ku që të dyja i vlerësuan bisedat si të frytshme.
PD çoi n/kryetarin Spaho – dhe pa u kuptuar se pse një jo jurist – i cili tha:
“Ne parashtruam qëndrimin e PD-së i cili në thelb është se nuk duhet të ketë dy standarde, por standardi që zbatohet për prokurorët dhe gjyqtarët duhet të aplikohet për politikanët, kur flasim për lidhje me botën e krimit të organizuar. Shpjeguam me fakte se asnjë reformë në Shqipëri nuk do të ketë sukses nëse nuk do të shkëputen lidhjet e politikës me krimin e organizuar”.
PS çoi një jurist, Ulsi Manjan, i cili tha:
“Në këndvështrimin tonë takimi me delegacionin ishte shumë i frytshëm. Ishte një takim informues dhe sqarues me pyetje dhe përgjigje nga të dyja palët. Ne besojmë shumë në kompetencën de autoritetin e Komisionit të Venecias lidhur me opinionet e tyre lidhur me ndryshimet kushtetuese. Shpjegimet dhe mendimet tona do t’ua dorëzojmë edhe me shkrim edhe pse në materialin që kemi dërguar në Venecia nga Kuvendi ne i kemi dërguar disa pyetje. Por gjithësesi ne mirëpresim opinionin e Venecias si tabanin e demokracisë.
Ndërsa pak më parë pashë që pati një prononcim edhe nga opozita, që u shprehën se takimi me Komicionin e Venecias ishte rezultativ. Por në fakt nuk di kujt t’i besoj: asaj që tha Spaho sot apo asaj që tha Basha dje në Berat. Se dje tha: ‘unë nuk e di pse vjen Komisioni i Venecias sepse ne nuk i kemi ftuar’. Ndërsa sot zoti Spaho dhe delegacioni i opozitës e konsideruan takimin frytdhënës dhe vlerësojnë ndihmën e Komisionit të Venecias”.
Ndërkohë, Venecia ende nuk e ka dhënë verdiktin e saj, të cilin pritet ta japë në dhjetor. /tesheshi.com/
