Çmimi i Madh i Spanjës, gara e pestë sezonale në Formula 1, ka qenë një ndër më dramatiket deri tani. Gjermani Vettel ka fluturuar me Ferrari-n e tij, por një strategji tepër e mençur e Mercedes-it ka bërë që ai t’i hapë rrugë Hamilton-it, britanikut që mbërriti i pari në finish.
Sebastian Vettel do të kishte një nisje të shkëlqyer, aq sa do të merrte menjëherë kryesimin. Kulmi i pilotimit të tij fantastik do të ishte parakalimi i Bottas-it në xhiron e 25-të, një veprim i mahnitshëm.
Bottas po e mbante prapa Vettel-it, që po humbte sekonda të çmuara ndaj Hamilton-it. Situatë që e detyroi gjermanin të shmangej sa majtas aq djathtas për të çoroditur finlandezin para; taktikë që rezultoi e suksesshme, me një parakalim të shkëlqyer.
Hamilton mundi ta merrte kryesimin falë një strategjie të përsosur të ndërrimit të gomave që i dha epërsi atij në pistë. Rivaliteti i tij me Vettel-in qe mbresëlënës, parakalimi po ashtu.
Hamilton siguroi vendin e parë në podium, ndjekur nga Vettel, me Ricciardo-n e Red Bull-it që plotësoi treshen fituese.
Mercedes-i, Ferrari dhe Red Bull-i e mbyllën me nga një pilot garën pas tërheqjeve të Bottas-it, Raikkonen-it dhe Verstappen-it.
Pavarësisht vendit të dytë në Spanjë, Vettel vazhdon ta mbajë kryesimin e botërorit të Formulës 1, me 104 pikë, gjashtë më shumë se Hamilton i vendit të dytë. /tesheshi.com/
