Çmimi i Madh i Gjermanisë është fituar në mënyrë të pabesueshme nga Lewis Hamilton, i kthyer në vendin e parë në renditjen botërore të Formulës 1.
Mercedes i është gëzuar një fitoreje të dyfishtë, me Bottas-in në vendin e dytë, duke marrë dhe kryesimin e konstruktorëve.
Gjithçka është përmbysur për Sebastian Vettel-in, kryesuesin e garës, në xhiron e 52-të, kur një pistë e lagur nga një shi kalimtar e ka nxjerrë atë jashtë, me makinën Ferrari të përplasur në muret mbrojtëse.
I vetmi ngushëllim për kokëkuqen italiane ka qenë vendi i tretë i Raikkonen-it, që pak vlen si për të, ashtu dhe për skuadrën.
Hamilton do të nisej nga vendi i 14-të, për ta mbyllur garën në vendin e parë. 188 pikë ka ai tani kundrejt 171 të Vettel-it. Mercedes kryeson me 310 pikë, tetë më shumë se Ferrari ndjekës tashmë.
Për të nënvizuar, urdhrat e dy skuadrave më të mira të sezonit i kanë hequr emocionin kësaj gare, të kthyer gati në një farsë. Raikkonen u urdhërua fillimisht t’i hapte rrugë shokut të skuadrës, Vettel-it, ndërkohë që më vonë do të ishte Bottas që do të urdhërohej ngjashëm prej inxhinierëve të tij për të mos e bezdisur Hamilton-in dhe për të mos kërkuar parakalimin e tij.
Formula 1 kthehet pas një jave, me garën hungareze, pasuar më tutje me një pushim të gjatë në gusht. /tesheshi.com/
