Edi Rama ka marrë garanci se Athina zyrtare nuk do të vendosë veton për hapjen e negociatave të Shqipërisë në Bashkimin Europian.
Burime relevante diplomatike i bënë të ditur tesheshi.com se në lojë kanë hyrë dy aktorë shumë të mëdhenj: Uashingtoni dhe Berlini.
Si në rastin e hyrjes në NATO kur Shqipërisë iu tha se duhet të plotësohen kushtet dhe më pas t’ja lërë SHBA-së lobimin e nivelit të lartë, edhe në këtë rast duket gjithçka është zgjidhur shumë lart.
Mësohet se kancelarja Merkel do të diskutojë personalisht me kryeministrin e Greqisë, Alexis Tsipras përpara Këshillit të Ministrave të BE-së kur do të merret vendimi për hapjen e negociatave, që do të jetë në mesin e këtij muaji.
Gjermania është kreditorja më e madhe e Greqisë, dhe influenca e saj është shumë e madhe në Athinë, edhe pse krerët e Syriza-s në pushtet kanë sulmuar shpesh Berlinin e në veçanti Angela Merkelin.
Ndërkaq, tashmë nga Parlamenti Europian është dhënë “ok” i parë që Shqipëria të hapë negociatat me Bashkimin Europian.
Këtë do ta vendosë Komisioni, por më përpara një sinjal do të jepet në mbledhjen e 7 nëntorit në Bruksel, ku do të mblidhet Komiteti Parlamentar i Stabilizim-Asociimit BE–Shqipëri.
Në pikën 1 të raportit të përgatitur nga Komiteti, ritheksohet mbështetja e plotë për anëtarësimin e Shqipërisë në BE, si dhe i bëhet thirrje Komisionit Evropian dhe Këshillit Evropian që të caktojë një datë për të hapur negociatat.
Por kërkohet nga vendi ynë zbatimi me shpejtësi i reformës në drejtësi.
Nga ana tjetër, raporti i bën thirrje institucioneve përgjegjëse për të vazhduar zbatimin e ligjit për integritetin e personave të zgjedhur ose të emëruar në poste publike – pra dekriminalizimin – dhe për të forcuar procesin e shqyrtimit në dritën e zgjedhjeve të ardhshme parlamentare.
Në raport flitet për një trend pozitiv në operacionet në lidhje me shkatërrimin e parcelave të kanabisit dhe rënie të përgjithshme të atyre të mbjella, si dhe bashkëpunimit të suksesshëm ndërkufitar, sidomos me autoritetet italiane, në parandalimin dhe goditjen e aktiviteteve të kultivimit të kanabisit.
Në rekomandimin 12 të këtij dokumenti u bëhet thirrje të gjitha palëve që të punojnë së bashku, për të krijuar një mjedis që nxit lirinë e vërtetë të medias dhe lirinë e shprehjes, duke shmangur çdo formë të censurës në media.
Në dokument thuhet se Komiteti për Stabilizim Asociim Shqipëri-BE, do të bëhet nën drejtimin e Monika Macovei për delegacionin e Parlamentit Europian dhe Taulant Ballës për delegacionin e parlamentit shqiptar, ndërsa këto rekomandime për Shqipërinë, janë dakordësuar mes ministres sonë të Integrimit, Klajda Gjosha dhe drejtores së Ballkanit Perëndimor në Drejtorinë e Zgjerimit të BE-së, Genovefa Ruiz Cavalera, në prag të daljes së opinionit të përvitshëm mbi përparimin e vendit tonë, në pritje të hapjes së negociatave të anëtarësimit. /tesheshi.com/
