Lëvizja Vetëvendosje ka reaguar ashpër pas arrestimit të Donika Kadaj- Bujupi dhe operacioneve të policisë nëpër shtëpitë e Albin Kurtit e Albulena Haxhiut
Forca kryesore e opozitës kërkon lirimin e menjëhershëm të Donika Kadaj-Bujupi dhe kanë deklaruar se aksioni opozitar nuk do të ndalet deri në tërheqjen përfundimtare të marrëveshjes së “Zajednicës dhe Demarkacionit të Kufirit me Malin e Zi.
Deklarata e plotë
“Policia ka arrestuar deputeten Donika Kadaj – Bujupi ndërsa ka rrethuar banesën e deputetëve Albin Kurti dhe Albulena Haxhiut. Banesa e Albin Kurtit dhe ajo e Albulena Haxhiut janë bastisur nga Policia e Kosovës dhe aktualisht brenda po qëndrojnë disa policë.
Policia po i përgjigjet urdhërave policore të Isa Mustafës dhe Hashim Thaçit të cilët janë të gatshëm ta shndërrojnë Kosovën në shtet policor, vetëm që të mos heqin dorë nga pushteti i tyre dhe nga marrëveshjet që kanë bërë me Serbinë.
Deputetja Kadaj – Bujupi duhet liruar menjëherë dhe përndjekja ndaj opozitës duhet të përfundojë.
Ne nuk do të ndalemi pa u tërhequr marrëveshjet me Serbinë, pavarësisht sa larg është i gatshëm të shkojë pushteti, në mbrojtje të “Zajednicës”.
/tesheshi.com/
