Partia opozitare, Lëvizja Vetëvendosje, insiston për atë që quan skandali i korrupsionit në Sistemin e Sigurimeve e Shëndetësore, ku përmes një kumtese për mediat, ka bashkangjitur edhe dokumente.
Sipas VV, ky skandal është vetëm një nga shembujt se si funksionon mentaliteti qeverisës i pushtetarëve aktualë, të cilët VV i quan kriminelë, hajna e mashtrues.
Në këto dokumente, sipas VV-së, gjendet kontrata e nënshkruar nga Ymer Shahini në emër të kompanisë PRINTEC, e cila dje është mohuar nga ish – ministri i Punëve të Jashtme Enver Hoxhaj.
VV këmbëngul se në këtë kontratë është edhe nënshkrimi i ish ministrit të Shëndetësisë Ferid Agani dhe sekretarit të përgjithshëm të ministrisë, Gani Shabani.
Kjo kontratë ka vlerë afër 1.5 milion euro, dhe ka të bëjë me zhvillimin e Sistemit të Sigurimeve Shëndetësore (SISH), përkujton VV.
“Edhe pse kontrata është lidhur dhe paratë janë marrë, projekti për SISH nuk është zbatuar. Kemi të bëjmë me një vjedhje klasike të gjithë parave të destinuara për këtë projekt. Kjo nuk është hera e parë që Ymer Shahini vjedh skema të Sigurimeve, apo që mashtron me kontrata të tilla”, – thuhet në kumtesë.
Vetëvendosje bën me dije se ka dërguar njoftimin e FBI-së, sipas të cilit, drejtori i Përgjithshëm i PRINTEC-ut, Ymer Shahini, miku (vëllai i gruas) së Enver Hoxhajt, është i kërkuar (dhe i dënuar me 65 vjet për mashtrim e vjedhje të Sigurimeve).
Enver Hoxhaj dje kishte përgënjeshtruar pretendimet e Vetëvendosjes lidhur me këtë çështje duke i quajtur ato “fashizëm politik”. /tesheshi.com/
