Deputetë e aktivistë të Vetëvendosjes, bashkë me qytetarë të shumtë, bënë homazhe tek varri i Mon Balajt në Besianë, tek varri i Arben Xheladinit në Prishtinë, në 11-vjetorin e vdekjes së tyre gjatë protestave kundër planit të Ahtisarit.
Me këtë rast kryetari i VV-së, Albin Kurti në fjalën e tij para pllakës përkujtimore në sheshin kryesor të Prishtinës tha se protesta e 10 shkurtit është themel për Vetëvendosjen.
“Sikurse sot edhe me 10 shkurt të vitit 2007 ishte ditë e shtune, sikurse sot moti i ishte me shi, sikurse sot ne ishim mbledhur në qendër të qytetit, për dallim prej asaj date, policia na preu rrugen në këtë shesh. Policia e UNMIK-ut ishte me armatim të rëndë, ku u ndërhy kundër protestuesve dhe u vranë Mon Balaj dhe Arben Xheladini. “232 plumba u shkrepën në gjoksat dhe kokat e protestuesve, derisa ata ishin duke u tërhequr. Edhe vet departamenti i UNMIK-ut pat thënë që vrasjet nuk ishin të nevojshme dhe kanë qenë të evitueshme. Armatimi që ishte sjellë nuk ishte për ekspozim, por për përdorim”, tha ai.
Ai tregoi edhe ç’rrugë duhet ndjekur për të ardhmen.
“Pa ndërprerjen e diskriminimin mbi baza etnike dhe fetare, pa e bërë demokracinë e njëmend në institucione e në shoqëri, pa e pasur Kosova ushtrinë e vet, pa u zbrapsur Serbia nga ambiciet dhe apetitet e saja shoviniste dhe hegjemoniste nuk do të mund të kemi liri, demokraci, zhvillim dhe sovranitet, atë çfarë paraqet ëndrra dhe dëshira e dëshmorëve tanë që janë dëshmi për të kaluarën tonë të lavdishme dhe udhërrëfyes për të ardhmen tonë”, tha Kurti.
Kurse deputetja Fitore Pacolli tha se nuk do harrojnë dy aktivistët që humbën jetë para 11 viteve.
“Ne nuk do t’i harrojmë asnjëherë Monin e Arbenin dhe do të vazhdojmë pa u ndalur drejt vullnetit të tyre që të mos lejojmë as të copëtohet e as të falet territori ynë përmes Zajednicës e Demarkacionit”, tha ajo.
