Lëvizja Vetëvendosje ka reaguar ndaj vendimit të Gjykatës Kushtetuese e cila rrëzoi kërkesën e opozitës për gjykatën Speciale, duke theksuar se kjo gjykatë edhe një herë vërtetoi kapjen e shtetit.
“Sot, Gjykata Kushtetuese edhe njëherë e vërtetoi kapjen strukturore të pushtetit. Me përmbajtjen e aktvendimit me të cilin ka vlerësuar si të papranueshme kërkesën e 24 deputetëve të Kuvendit të Republikës së Kosovës, kjo gjykatë ka hequr dorë nga mbrojtja preventive dhe represive e rendit kushtetues. Një gjykatë e tillë, e cila formalisht konsiderohet si autoriteti përfundimtar për interpretimin e Kushtetutës, e redukton veten brenda kapitullit II mbi të drejtat elementare, e kur e bëri vlerësimin e amendamentit XXIV për themelimin e Dhomave të Specializuara dhe Zyrës së Prokurorit të Specializuar, tejkaloi pak edhe Kapitullin II për t’u marrë edhe me Kapitullin III mbi të drejtat e komuniteteve dhe pjesëtarëve të tyre,” thuhet në reagimin e Vetëvendosjes.
Sipas Vetëvendosjes, Gjykata Kushtetuese e ka shpjeguar natyrën e interpretimit të ardhshëm lidhur me të ashtuquajturin “dekretin e Qeverisë” për themelimin e Zajednicës.
“Për më keq, kjo gjykatë tani ka kompetencën juridiko-kushtetuese, të njohur edhe në praktikën dhe teorinë gjyqësore që statusin e lëndëve dhe konstatimin formal të tyre ta ketë në qeveri”, thuhet në reagimin e Vetëvendosjes./tesheshi.com/
