Nga Blendi Gashi
Kuvendi i Kosovës nuk do të zhvillojë seanca normale dhe nuk do të ketë qetësi në institucionin ligjvënës pa tërheqjen e marrëveshjeve, asaj për “Zajednicën” dhe Demarkacionin me Malin e Zi. Këtë deklaratë të fortë e dha në muajin shtator Lëvizja Vetëvendosje dhe eksponentë të saj të lartë e përsëritën disa herë gjatë muajve të krizës së thellë politike, sidomos në protestat që u organizuan për rrëzimin nga pushteti të qeverisë “Mustafa”.
Por, nëntë muaj më vonë pikërisht VV hëngri fjalët duke u rikthyer në punimet e kuvendit pa shkaktuar tensione, duke mundësuar mbajtjen e një seance normale pas kaq muajsh.
Vetëvendosësit siç duket ishin përmalluar për të debatuar në kuvend për çështje të ndryshme, pasi pikërisht deputetë të saj diskutuan më së shumti në seancën e sotme.
Visar Ymeri sulmon Kadri Veselin
I pari fjalën nga VV në seancën e së enjtes e mori kreu i saj Visar Ymeri, i cili kritikoi qasjen e luftës ndaj korrupsionit dhe kërkoi angazhim më të madh kundër kësaj dukurie.
Ai tha se Kosova është shndërruar në plaçkë të politikanëve, derisa sulmoi kryekuvendarin Kadri Veseli.
“Vetëm 17 vite pas luftës kanë filluar aksionet e lirimit të pronave të uzurpuara, por ky nuk është luftim kundër korrupsionit. Aksioni duhet të fillojë nga koka e jo nga bishti, pasi Kadri Veseli po pretendon se po e shpëton Kosovën. Koka e SHIK-ut që e ka kapur Kosovën po paraqitet si shpëtimtari”, – tha ai.
Sipas tij tash e sa kohë vendi po përballet me dy lloj uzurpimesh.
“Regjimi i koncesionarëve me “Zajednicën” dhe Demarkacionin me Malin e Zi. Vendi që duhet të ishte Republikë e qytetarëve u shndërrua në plaçkë të qytetarëve. Kemi parë lirime të pronave të uzurpuara e që është hajni e popullit të Kosovës. Çlirimi i pronave te uzurpuara është i domosdoshëm por krimi luftohet nga koka e jo nga bishti e krimin e kemi në krye të Kuvendit”, tha Ymeri.
Ai ka përmendur edhe fondin e 3 përqindëshit që është udhëhequr nga Bujar Bukoshi dhe Isa Mustafa.
“E vërteta e plotë e Kosovës së pasluftës është 3 përqindëshi. Vjedhja e Isës dhe Kadrisë me shokë është kjo kokë kriminelësh që duhet luftuar dhe ndalur. Kriminelët nuk do të fitojnë”, tha Ymeri
Donika e “etur” për kuvend, s’largohej nga foltorja
Pas Ymerit fjalën e morën edhe deputetë të tjera të VV-së, Donika Kadaj-Bujupi, Glauk Konjufca, Albulena Haxhiu e Faton Topalli.
Deputetja e Lëvizjes Vetëvendosje, Donika Kadaj-Bujupi është treguar entuziaste sot pas kthimit në Kuvendin e Kosovës. Ajo ka folur në seancë për herë të parë si deputete e Vetëvendosjes.
Kadaj-Bujupi ka shprehur entuziazëm të madh gjatë fjalës së saj, saqë edhe pas përfundimit të minutazhit, nuk ka dashur të largohet nga foltorja.
Ajo adresoi kritika të ashpra në qeverinë e Kosovës për dështime në anëtarësimet e organizatave ndërkombëtare si dhe për dështimin e shtrirjes së sovranitetit në Mitrovicë.
“Kur filluam legjislaturën e vitit 2007 na ishte thënë se do të kemi njohje, do të jemi anëtarë në OKB dhe për vizat për të vazhduar me mbi 200 mijë vende pune. Sot e pas 17 vjet të mbarimit të luftës në Kosovë jo që nuk arriti të anëtarësohet në OKB, por Kosova me këtë regjim në krye s’po mund ta shtrijë sovranitetin as në Mitrovicë”, tha deputetja Kadaj-Bujupi.
Ajo shtoi se ky koalicion ka mbajtur vetëm një premtim, negociatat me Serbinë me të cilat rrezikuan sovranitetin e vendit.
“Vit pas viti tkurrej territori dhe shkuan deri aty që deshën ta formojnë një shtet të ri brenda shtetit. Ura e Ibrit me marrëveshjen e 26 gushtit duhet të lirohet gjatë këtij muaji”, tha Kadaj Bujupi.
Konjufca kritikon Kushtetuesen për vendimin për Manastirin e Deçanit
Deputeti tjetër i VV-së Glauk Konjufca në paraqitjen e vet ka përmendur vendimin e Gjykatës Kushtetuese lidhur me pronën në Deçan.
Ai tha se Kushtetuesja me këtë vendim ka përligjur vendimet pushtuese të Slobodan Milosheviçit.
Konjufca ka kërkuar që në Kuvend të bëhesh shfuqizimi i këtij vendim i të Kushtetueses.
Para fillimit të seancës, deputeti i Vetëvendosjes tha se janë kthyer në Kuvend dhe do të marrin pjesë derisa zhvillohen të gjitha pikat tjera pa demarkacion me Malin e Zi dhe “Zajednicën”.
Ai shtoi se Demarkacionin dhe “Zajednicën” nuk do t’i lejojnë në asnjë mënyrë të kalojnë.
Konjufca nuk tregoi mënyrat se si do të kundërshtojnë, por shtoi se do të vendoset dhe shihet në të ardhmen.
Haxhiu e Topalli: Qeveria e Kosovës po e bojkoton punën e Kuvendit
Dy deputetët e tjerë të VV-së Albulena Haxhiu e Faton Topalli janë marrë me mungesën e ministrave në seancën e sotme.
Topalli ka thënë se Vetëvendosje-n dhe gjithë punën në kuvend po e bojkoton qeveria e Kosovës me mospjesëmarrjen e saj në punimet e Kuvendit siç po ndodh sot.
Edhe Albulena Haxhiu, deputet nga kjo parti ka folur në njëjtën linjë. “Kjo qeveri nuk po e di që Kosova është Republikë parlamentare e jo qeveritare. Na kanë bëre presion që të kthehemi në Kuvend, ku janë qeveritarët tash”, ka thënë Haxhiu.
Ndryshe, dy partitë e tjera opozitare AAK e NISMA për Kosovën nuk janë kthyer në punimet e kuvendit, ndërsa vendimin e VV-së për t’iu kthyer punimeve e kanë quajtur të pamenduar mirë dhe bërje të kuorumit për koalicionin qeverisës. /tesheshi.com/
