Pasi shprehën shqetësimet për praninë e madhe të produkteve serbe në panairin “Prishtina 2018” përmes një konference për media të mbajtur të mërkurën, Vetëvendosje sot ka organizuar një aksion simbolik në fshatin Bërnicë, në vendin ku mbahet panairi, me ç’rast kanë shpalosur një pankartë me mbishkrimin “jo normalizimit të hegjemonisë ekonomike të Serbisë në Kosovë”.
Policia ka lejuar ata që këtë pankartë ta vendosin në rrethojat e objektit ku po mbahet panairi.
Kujtojmë se në këtë panair që po organizohet nga Oda Ekonomike e Kosovës po marrin pjesë 174 biznese pjesëmarrëse, 70 prej tyre janë nga Serbia, ndërsa vetëm një ishte nga Shqipëria.
Përfaqësues nga Shqipëria dhe ambasadori shqiptar në Kosovë, Qemal Minxhozi nuk morën pjesë në hapjen e panairit. Ky i fundit fajësoi organizatorët se nuk ka bërë një organizim të duhur dhe nuk i ka njoftuar bizneset shqiptare për të marrë pjesë në panair, edhe pse ato kanë shprehur interes. /tesheshi.com/
