Zhvillimet në zonën e “Astirit” një ditë më parë, ishin dhe starti i Vetëvendosjes në zhvillimet politike shqiptare, pa pritur zhvillimin e marshimit të paralajmëruar në 28 Nëntorin e Pavarësisë.
VV dega e Shqipërisë, iu qas asaj çfarë po ndodhte te Unaza, duke u vetndjerë aktor politik normal, pa kufij mes Prishtinës dhe Tiranës.
“Korrupsioni, skandalet, parregullsitë dhe standardet e dyfishta e kanë karakterizuar të gjithë procesin e projektit të ‘Unazës së Re’. Një shtet i së drejtës nuk ndërtohet përmes një pushteti arbitrar me dhunë strukturore e direkte ndaj qytetarëve. Çështja e pronave në zonën e ‘Astirit’ duhet të zgjidhet duke përdorur një standard të drejtë e të barabartë për të gjithë qytetarët”, thuhej në deklaratën e VV-së, së cilës Bashkia e Tiranës iu përgjigj duke i kujtuar statusin si forcë kosovare.
“Ne dimë se Vetëvendosja është votuar të qeverisë Kosovën dhe jo të bëjë djalin e Fahriut apo suflerin e Orjolës në Tiranë. Nëse Vetëvendosja kërkon të marrë votat e një PD-je të degraduar, kjo nuk bëhet duke e imituar atë, por duke treguar se bën tjetër lloj politike!”, u tha nga institucioni i drejtuar prej Erion Veliajt.
E po në të njëjtën frymë, pra për të sqaruar identitetin politik të VV-së në raport me zhvillimet në Shqipëri, nga kjo e fundit, me gjuhën e Enis Sulstarovës si kryetar Bordi, u tha: “…mendojmë se jemi në të drejtën tonë kur shprehemi për çështjet e Tiranës, siç është kushdo që ia do të mirën kryeqytetit. Por duhet shtruar seriozisht pyetja se a është në të drejtën e vet kryetari i partisë që drejton Bashkinë e Tiranës, kur merret vesh me Vuçiçin për ‘marrëveshje rajonale’, në emër edhe të Kosovës? Nuk shkon kështu, këta na thonë se shqiptari s’paska të drejtë të flasë për Tiranën, kur po të njëjtët ftojnë serbët të flasin për Kosovën, pa Kosovën”, u tha nga Sulstarova, ku pra pretendohet se Rama po ndërhyn në punët e Kosovës. /tesheshi.com/
