Opozita shqiptare hapi këtë të mërkurë siparin e akuzave për vitin 2017 duke marrë shkas nga vetëvarja e një 22-vjeçari në burgun e Rrogozhinës, i dënuar për konsum droge. Ishte sekretarja e marrëdhënieve me publikun, Grida Duma ajo që akuzoi qeverinë Rama për standarte të dyfishta në drejtësi, ku sipas saj, dikush dënohet për një cigare e hashash e dikush që e trafikon atë me tonelata mbetet i lirë.
“Me Edi Ramën, Klement Balili është i lirë. Po me Edi Ramën, një i ri 22-vjeçar, Estref Halili, i arrestuar nga policia, sipas familjarëve të tij me 3 gramë hashash, trajtohet pa mëshirë dhe shtyhet drejt vetëvrasjes në qeli. Këto janë dy standardet e Edi Ramës”, ka deklaruar Duma.
Kjo e fundit i ka bërë thirrje prokurorisë që të hetojë me urgjencë dhe seriozitet të gjitha procedurat që janë ndjekur nga policia dhe autoritetet e burgjeve në rastin e 22-vjeçarit Halili. “Të hetojë e të nxjerrë para ligjit përgjegjësit”, ka shtuar Duma, ndërkohë që nga Drejtoria e Burgjeve është thënë se rasti po hetohet. Kjo pasi edhe nga familja e të ndjerit janë shfaqur akuza ndaj shtetit për trajtim të padrejtë. /tesheshi.com/
