Kreu i partisë shqiptare në pushtet, BDI-së, Ali Ahmeti, ka shkaktuar një shastisje në të gjithë opinionin maqedonas pas vetëshpalljes së tij hero, gjatë një interviste në Alsat-M. Ai, në emisionin 200, tha se ka arritur të shkatërrojë e përmbys një perandori të tërë.
”Kundërshtarët e mi edhe po të kishin lindur edhe një herë nuk do ta kishin arritur atë që e bëra unë. Unë kam shkatërruar një perandori, unë kam përmbys një Jugosllavi. Natyrisht unë me shokët e mi. Se trimi i mirë është me shokë shumë.”, ka deklaruar Ahmeti.
Ndërsa sa i përket takimit të përbashkët të liderëve partiakë, i cili u realizua para disa ditësh ndërmjet tij dhe përfaqësuesve të Aleancës për Shqiptarët, Ali Ahmeti ka shprehur keqardhje për mungesën e dy partive tjera si Lëvizja BESA dhe PDSH. Sipas tij, do të ketë edhe një takim tjetër, me ç‘rast planifikohet të nënshkruhet një memorandum i përbashkët para koalicionimit me partitë maqedonase.
“Më vjen keq që nuk morën pjesë dy parti tjera dhe kam konsideratë për analizat që bëjnë si subjekte. Të koalicionit ‘Rilindje me Besë’ më premtuan se do i përgjigjen takimit të përbashkët dhe pasuan disa komunikata që nuk është në dobi të tyre. Nuk e kam bërë ftesën për të bërë politikë që partitë shqiptare të ulen në tavolinë që të zënë vend në ekranet televizive apo të jenë aktual në mediat e shkruara apo elektronike, e kam bërë me sinqeritet për t’u bërë bashkë. Nuk ka ndonjë arsye për të qenë të ndarë. Dera është mbetur e hapur edhe për partitë tjera, nuk është mbyllur, por edhe nuk mund të ushtrojmë ndikimet tona, sepse fundja ata kanë autonominë e tyre. Ne në takimin e rradhës planifikojmë të nënshkruajmë një memorandum të përbashkët për të drejtat e shqiptarëve”, tha Ahmeti.
Madje, lideri i BDI-së ka shtuar se nuk mund të flas për preferenca sa i takon koalicionimit në të ardhmen, por se po bëjnë strategjinë e veprimit të tyre politik për të ardhmen e shqiptarëve.
“BDI nuk negocion as me njërën e as me tjetrën palë. Pra, zyrtarisht nuk ka negociata as me njërën e as me tjetrën palë nga partitë maqedonase. BDI ka fituar zgjedhjet përballë shumë partive. BDI po bën strategji sesi të përballet me të ardhmen”, ka thënë Ahmeti.
Ndërkaq, në pyetjen nëse vendi mund të mbetet pa qeveri, ai u përgjigj kështu: “Kjo do ishte zgjidhja më e keqe që vendi të shkojë në këtë drejtim”.
M.Krasniqi‑/tesheshi.com/
