Vetëm Rusia e Vladimir Putinit ka njohur fitoren e Maduros në Venezuelë. SHBA, Bashkimi Europian dhe Kanadaja nuk e kanë njohur atë, duke i cilësuar zgjedhjet presidenciale një “farsë”.
Madje Uashingtoni ka shkuar edhe më tej, duke shtuar sanksionet ndaj Karakasit. Presidenti Trump firmosi një dekret që ndalon Venezuelën që të shesë asetet shtetërore në bursën ndërkombëtare të Nju Jorkut.
“Shtetet e Bashkuara janë në krah të popullit të Venezuelës që po vuan në regjimin e Maduros. I kërkojmë atij të rikthejë demokracinë në vend, të mbajë zgjedhje të drejta e të ndershme dhe të lirojë nga burgu të burgosurit politikë”, tha Trump.
Në letrën e tij, presidenti rus Vladimir Putin përveçse uroi Maduron për fitoren, shprehu mbështetjen për të vazhduar “partneritetin strategjik ndërmjet Rusisë dhe Venezuelës”.
Putin i bëri thirrje aleatit të tij që të nisë një dialog kombëtar për të pajtuar vendin.
Mike Pence, zv,presidenti amerikan tha se “zgjedhjet presidenciale në Venezuelë ishin një turp”.
Ndërkaq edhe 14 vende të Amerikës Latine, ndër ta Argjentina, Brazili, Kanadaja, Kili, Kolumbia dhe Meksika, pra vendet më të mëdha të rajonit, bënë të ditur se kanë marrë një vendim për të ulur nivelin diplomatik të përfaqësimit me Venezuelën.
/tesheshi.com/
