Kryeprokurori Aleksandër Lumezi, ka thënë se viti 2015 ishte viti më efikas i prokurorisë së Shtetit për kallëzime penale.
Në një konferencë për medie të mbajtur sot, Lumezi ka thënë se vitin e kaluar prokuroria ka pranuar 25,412 kallëzime penale, prej tyre 25,183 janë kryer nga prokurorët.
Ai ka theksuar se prokuroria Speciale ka pranuar 119 kallëzime penale, të cilat i ka zgjidhur së bashku me ato të trashëguara nga vitet paraprake.
“Ky ka qenë viti më efikas i prokurorisë Speciale”, ka thënë Lumezi, i cili ka bërë të ditur se zyra e kryeprokurorit të Shtetit ka pranuar në punë 1189 lëndë dhe ka kryer 1210. Pra, më shumë lëndë sepse janë kryer lëndë edhe të viteve të kaluara. Në Prishtinë, departamenti për krime të rënda ka pranuar në punë 1110 kallëzime penale dhe i ka zgjedhur 1141. Edhe të viteve të kaluara”, ka shtuar ai.
Kryeprokurori Lumezi gjithashtu ka njoftuar se deri tani janë shënjestruar 29 raste të profilit të lartë dhe nga to janë ngritur aktakuza në 16 raste.
Sfidë e prokurorisë, sipas Lumezit, do të jetë numri i madh i lëndëve të trashëguara dhe moszbulimi i kryerësve të veprave penale. Ai ka thënë se pritet të funksionalizohet edhe Prokuroria në veri, sipas marrëveshjes për drejtësi mes Kosovës dhe Serbisë.
Prokuroria Speciale ka 29 kallëzime penale të nivelit të lartë, 16 prej të cilave janë ngritur aktakuza.
Lumezi ka deklaruar se pret që gjatë vitit të ardhshëm, prokurorët të angazhohen në luftimin e krimit dhe korrupsionit sepse kjo do të jetë sfidë e vazhdueshme. /tesheshi.com/
