Kryeparlamentari kosovar Kadri Veseli, në ditën e dytë të vizitës në Emiratet e Bashkuara Arabe është pritur në Dubai nga ministri i Ekonomisë, Sultan Bin Saed Al Mansouri, me të cilin kanë diskutuar për bashkëpunimin ekonomik mes dy vendeve.
Veseli ka prezantuar potencialet që ka Kosova për investime në agrokulturë, turizëm dhe industri.
Nga ana e tij, ministri Al Mandouri tha se “Emiratet e Bashkuara Arabe e shohin Kosovën si vend strategjik për investime në turizëm dhe bujqësi, për shkak të pozitës gjeografike”.
“Kosova ka potencial dhe resurse përmes të cilave mund të krijojë perspektivë të sigurt për zhvillim të hovshëm ekonomik”, ka thënë Al Mandouri.
Kurse, Veseli kërkoi nga ministri i Ekonomisë që t’i nxisë investitorët e Emirateve të vizitojnë Kosovën dhe të investojnë në fushat përkatëse, pasi sipas tij, Kosova ofron shumë mundësi dhe ka resurse humane për investitorët e huaj. /tesheshi.com/
