Kryetari i PDK-së, Kadri Veseli në konventën VIII zgjedhore të partisë ka folur për themelimin e ushtrisë me ç’rast ka goditur Isa Mustafën dhe LDK-në, duke thënë se ushtria do bëhet dhe do thellohet partneriteti me miqtë ndërkombëtarë.
“Askush mos të ketë dilemë dhe mos t’i fërkoj duart. Askush mos të mendojë se miqësia jonë me SHBA-në do të cenohet apo prishet nga ndokush. Nuk ka barrier që na pengon ëndrrën tonë për tu integruar në BE dhe anërarsuar në NATO. Ne do ta bëjmë ushtrinë e Kosovës, do ta bëjmë” , tha Veseli, sigurisht duke aluduar në drejtuesit e LDK-së që haptaz janë shprehur se ushtria nuk duhet të bëhet pa partneritet me SHBA-në dhe NATO-n.
Veseli ka folur edhe për tensionet politike me ç’rast ka thënë se po harrohen prioritetet.
“Para nesh ndodhën shumë sfida por unë kam besim të plotë në shtetin e Kosovës. Populli ynë ka kalu në sfida të mëdha. Jam i bindur se do t’ia dalim edhe sfidës për shtetin tonë. Ne e çliruam Kosovën sepse e donim lirin më shumë se vetën tonë”, ka deklaruar Veseli.
Konventa e PDK-së do mbahet dy ditë, sot dhe nesër ku edhe do dalin organet e reja drejtuese të kësaj partie. /tesheshi.com/
