Vera e këtij viti, pra periudha qershor-gusht 2022, e shënuar nga disa valë të nxehti dhe thatësira të rënda të shoqëruara me ngrohjen globale, ishte më e nxehta e regjistruar ndonjëherë në Evropë, njoftoi të enjten Shërbimi Evropian për Ndryshimet Klimatike Copernicus, transmeton AFP.
Temperaturat mesatare ishin “më të lartat, si për muajin gusht ashtu edhe për gjithë verën”, duke tejkaluar në tre muaj me 0.4 gradë Celsius ato të vitit 2021, që ishte rekordi i mëparshëm, tha Copernicus në një njoftim për shtyp.
Temperaturat ishin “afërsisht 1.34 gradë Celsius mbi mesataren e verës 1991-2020”, shton Copernicus.
Vetëm në muajin gusht, temperaturat ishin “larg më të lartat” e regjistruara ndonjëherë dhe ishin “1.72 gradë Celsius mbi mesataren 1991-2020”.
“Një seri intensive valësh të nxehtit në të gjithë Evropën, së bashku me kushtet jashtëzakonisht të thata, çuan në një verë ekstreme, me temperatura të larta rekord, thatësira dhe zjarre,” thotë shkencëtarja e Institutit Evropian, Freja Wamborg.
Thatësira dhe zjarret në shumë pjesë të Evropës prekën shoqërinë dhe natyrën në mënyra të ndryshme, theksoi ajo. /tesheshi.com/
