Nga Blendi Gashi
Shteti serb nuk e ka ndërmend të ndalet së provokuari. Pas fillimit të ndërtimit të lagjes “Lugina e Diellit”, pa lejen e institucioneve të Kosovës, së fundmi në veri të Mitrovicës kanë vendosur edhe shtatoren e Car Llazarit.
Vendimi për ta vendosur atë në qendër të veriut të Mitrovicës është marrë nga këshilltarët komunal të kësaj komune, ndërsa është kundërshtuar nga asamblistët shqiptarë dhe boshnjakë.
Vendosja e këtij busti ka ndodhur teksa institucionet e Kosovës nuk kanë dalë me ndonjë vendim, i cili do të lejonte apo kundërshtonte atw si akt.
Kjo shtatore do të zbulohet tw martën, me rastin e asaj që njihet si “Vidovdan”, të 28 qershorit, me të cilën Serbia feston të ashtuquajturën si Betejë tw Kosovës, e vitit 1389.
Zbulimin e shtatores do ta bëjë Marko Gjuriq, drejtori i të ashtuquajturës Zyre për Kosovën e Metohinë në Qeverinë e Serbisë.
Në politikën serbe ngrihet lart figura e mbretit Llazar, që shkon deri në legjendë, të cilën për qëllime të veta e kanë përdorur shpesh udhëheqësit serbë.
27 vjet më parë, përvjetori i kësaj beteje tuboi në mitingun e Gazimestanit rreth 1 milion serbë, aty ku u promovua fuqizimi politik i Slobodan
Milosheviqit, i cili më pas u bë njeriu numër një në hierarkinë politike në Serbi.
Për vendosjen e kësaj shtatoreje kanë raportuar edhe mediet beogradase. Gazeta “Blic.rs”, në një shkrim të sajin, tregon detaje për monumentin të cilët serbët e konsiderojnë legjendë të tyre.
Sipas tyre, Cari do të jetë i gjatë 8 metra ndërsa do të peshojë 7.5 ton. Kurse, “pamja e tij është dizajnuar me një shpatë në dorë, ndërsa në tjetrën duke treguar gishtin në drejtim të Gazimestanit”, shkruan kjo gazetë.
Reagim qeveritar
Përfaqësues të qeverisë thonë se respektojë kulturën dhe trashëgimin e komuniteteve në vend por vetëm duke u bazuar në ligjet e Kosovës.
Faton Abdullahu, këshilltar politik i kryeministrit Isa Mustafa thotë se qeveria e Kosovës është e përkushtuar në respektimin e kulturës dhe trashëgimisë të të gjitha komuniteteve të Kosovës, por gjithmonë duke u bazuar në ligjet, Kushtetutën dhe parimet mbi të cilat është ndërtuar Kosova.
“Ne si qeveri nuk jemi që mendësia e dëshmuar si e dëmshme të ndikoj, aq më pak të dirigjoj të tashmen dhe të ardhmen e qytetarëve të Kosovës dhe në përgjithësi në vlerat demokratike dhe multietnike të cilat po u i ndërtojmë. Përmendoret e të vdekurve para shumë shekujsh, nuk mund t’i kthejnë të gjallët në Kosovë, aq më pak nëse ato përmendore kthehen në gogol nacionalit. Ne duam të ndërtojmë fabrika të hapim vende të reja pune dhe të ndërtojmë një Kosovë me mundësi të reja për të gjithë pa dallime dhe gjithandej pa diskriminime”, ka thënë Abdullahu, për tesheshi.com.
Opozita: qeveria t’i ndal provokimet e serbëve
Zyrtarë të partive opozitare kërkojnë që institucionet e shtetit të marrin masa dhe të largohet busti i vendosur.
Ali Berisha, deputet i AAK-së thotë vendosjen e bustit të Car Llazarit në veri të Mitrovicës e quan zhvillim shqetësues.
“Është koha e fundit që Isa dhe Hashimi t’i thërrasin mendjes. Shteti duhet të veprojë sa më shpejt. Duhet një herë e mirë t’i thuhet ndal provokimeve serbe”, ka thënë Berisha, për tesheshi.com.
Jakup Krasniqi nga NISMA për Kosovën, thotë se ardhja e përmendores së Car Llazarit në Kosovën e lirë, të pavarur, sovrane e demokratike është vepër e kryeministrit Isa Mustafa dhe e presidentit Hashim Thai.
Krasniqi thotë se heshtja e qeverisë dhe e koalicionit qeverisës, për vendosjen e përmendores së Car Llazarit në Mitrovicë, është heshtje për shkak të marrëveshjeve të arritura në Bruksel.
“Kjo është një dëshmi tjetër, se këta njerëz që kanë lejuar e lejojnë gjëra të tilla kundër Kushtetutës e ligjeve, duhet të dorëhiqen.
Dorëheqjen këta njerëz duhet ta afronin po të kishin moral e përgjegjësi politike, sikur pozitat që i mbajnë, t’i mbanin për publikun e jo vetëm për veten e tyre. Kjo praktikë qeverisëse duhet të ndërpritet! Pa ndërprerjen e kësaj qeverisje, rrënimi i institucioneve të shtetit nuk do të ketë ndalje!”, ka thënë Krasniqi, për tesheshi.com.
Ndryshe, Serbia ka nisur në veri edhe ndërtimin e një lagjeje të re, të cilën e ka quajtur “Lugina e Diellit” e të cilën institucionet e vendit e kanë cilësuar si përpjekje për rikolonizim të Serbisë, e cila nuk do të lejohet. /tesheshi.com/
