Qeveria ka shtuar në listën e festave kombëtare, edhe 22 nëntorin, si Ditë të Alfabetit. Kjo u njoftua më parë nga kryeministri Rama gjatë samitit të Diasporës në nëntor 2023 e tani shpallet nga ministri i Jashtëm Igli Hasani.
Kjo u njoftua në përfundim të një mbledhjeje qeverie, ku Hasani tha Këshilli i Ministrave do t’i propozojë Kuvendit shpalljen e kësaj feste zyrtare.
“Do të miratohet një ndryshim për ligjin për festa kombëtare dhe ditët përkujtimore. Këshilli i Ministrave po propozon Kuvendit shtimin e ditës së alfabetit si një nga festat tona kombëtare. Është ditë me simbolikë të veçantë. 22 Nëntori specifikon momentin më të madh unifikues të shqiptarëve, që janë të shpërndarë në të gjitha vendet e Ballkanit dhe i bashkon gjuha”, tha ministri i Jashtëm shqiptar.
Kështu, veç 28 e 29 nëntorit, këtij muaji simbol në historinë shqiptare i shtohet dhe një festë me karakter atdhetar.
Kujtojmë se para viteve ‘90-të, në këtë muaj kremtohej ideologjikisht dhe 8 nentori, data e themelimit të PKSH-së që më pas do shndërrohej në PPSH. Por pasuesja PS e ka datën e themelimit në qershor, më saktë më 13 të këtij muaji, ditë kur në vitin 1991 vendosi të nndryshojë emrin. /tesheshi.com/
