Gjykata Kushtetuese e Austrisë ka anuluar rezultatin e zgjedhjeve presidenciale të vendit, në të cilat kandidati populist i ekstremit të djathtë, Norbert Hofer u mund ngushtë nga një kandidat i pavarur.
Kreu i gjykatës, Gerhart Holzinger, njoftoi mbajtjen e një balotazhi mes Hoferit të partisë së Lirisë dhe kandidatit të mbështetur nga të Gjelbrit, Alexander Van der Bellen. Votimet do të përsëriten në të gjithë vendin pasi një hetim nxorri parregullësi në llogaritjen e votave në disa lokalitete.
Vendimi i paprecedent vjen një javë përpara se kandidati që fitoi zgjedhjet, Van der Bellen të betohej për të nisur detyrën. Hofer humbi ndaj rivalit të tij në zgjedhjet e ngushta të 22 majit, me një shumicë prej vetëm 30, 863 votash më pak.
Ndërsa presidenca austriake ka më së shumti një rol ceremonial, rezultatet e tyre janë parë si tepër simbolike, pasi partia e Lirisë u duk se do të merrte presidencën e shtyrë lart nga ndjesitë kundër refugjatëve dhe nga pakënaqësia me mjedisin politik të vendit.
Partia e Lirisë e kontestoi rezultatin e votës pasi pretendoi se kishte diktuar parrëgullësi formale në 94 nga 117 lokalitetet, duke depozituar një padi formale prej 150 faqesh në gjykatën kushtetuese.
Gjatë hetimit, doli se në disa qendra të numërimit të votave, kishte nisur procesimi i votave përmes postës në prag të zgjedhjeve, në vend që të niste në ditën pas votimit, si e kërkon ligji elektoral austriak.
Dëshmitarët vunë në dukje në gjykatë se vëzhguesit e zgjedhejve në disa qendra kishin nënshkruar pa i lexuar procesverbalet e numërimit të votave. Edhe pse gjykata Kushtetuese nuk gjeti prova që rezultati i zgjedhjeve ishte manipuluar me qëllim, ajo konfirmoi parregullësitë që ndikonin në një total prej 77, 926 votash që kishin shkuar drejt dy kandidatëve- mjaftueshëm, në teori, për të ndryshuar rezultatin e zgjedhjeve.
Van der Bellen, një profesor ekonomike në pension dhe ish-lideri i partisë austriake të së Gjelbërve duhet të bënte betimin të premten e 8 korrikut.
Presidenti i gjykatës kushtetuese, Holzinger tha se vendimi “nuk e kthen asnjërin në fitues apo humbës”, por se zgjedhjet janë “baza themelore e demokracisë sonë”, kështu që duhet të ishin tërësisht funksionale.
“Edhe në një demokraci të qëndrueshme, vetëm bindja e plotë ndaj standardeve elektorale siguron besimin e qytetarëve tek demokracia jonë”, tha Holzinger.
Vendimi nuk ka precedent në Austri. Në vitin 1970 dhe 1995, gjykata kushtetuese e vendit ka urdhëruar rivotim, në disa këshilla të veçantë, por jo në të gjithë vendin.
Përgatiti: Juli Prifti – /tesheshi.com/
