Nuk ka dyshim se ne nuk mund të paramendojmë jetën tonë pa drurin. Ky material është përdorur në mijëra produkte që shumë njerëz i përdorin çdo ditë. Por për fat të keq, shumë nga këto produkte, qofshin ato mobilje druri ose tjera, janë përgjegjës për një shkallë të gjerë të shpyllëzimit tropikal. Më të prekurat janë pyjet e Argjentinës, Bolivisë, Brazilit, Paraguait, Indonezisë, Malajzië, dhe Papua Guinea e Re. Këto pyje të gjera që dikur ishin habitatet për qindra specie të gjalla, sot janë histori.
Në një situatë si kjo, një lajm i fundit vjen si një lehtësim për të gjithë dashamirët e natyrës: qeveria norvegjeze nuk do të blejë më produktet që kanë lidhje me shpyllëzimet tropikale. Kjo do të thotë se parlamenti nuk do të paguajë më për kontratat qeveritare me cilëndo kompani që pren dhe shkatërron pyjet.
Gjatë disa viteve të fundit, një numër i kompanive kanë vendosur të ndalojnë prokurimin e mallrave që kanë kontribuar në shkatërrimin e pyjeve. Megjithatë, deri më tani, kjo nuk është pasuar edhe nga qeveritë përkatëse.
Më në fund, ata ia dolën! Norvegjia është bërë vendi i parë në botë që angazhohet për një politikë zero të shpyllëzimit. Duke filluar nga tani, të gjitha produktet që janë të prokuruara nga vendi do të duhet të plotësojnë kërkesat e rrepta.
Norvegjezët u kanë bërë thirrje edhe vendeve të tjera për të bërë të njëjtën gjë, në veçanti Britanisë së Madhe dhe Gjermanisë.
Fundja, miliona njerëz në mbarë botën varen nga pyjet, dhe mbrojtja e “mushkërive të tokës” është përgjegjësi e të gjitha kombeve. Për fat të mirë, Norvegjia është duke marrë hapin e parë në drejtimin e duhur. /tesheshi.com/
