Nga Shkëlzen Rrecaj
Ende pa kaluar shumë kohë nga kërkesa për ndërtimin e një kishe katolike në Llapushnik, fshat ky me popullsisë dërmuese muslimane, në Kuvendin e Komunës së Drenasit ka mbërritur një kërkesë e ngjashme, por tani për ndërtimin e një kishe protestante në fshatin Tërstenik.
E tërë kjo histori duket se ka në thelb një mashtrim të madh, pasiqë toka në të cilën synohet të ndërtohet ky objekt kulti ishte dhënë për shfrytëzim nga Komuna e Drenasit për ndërtimin e një hoteli, i cili sado pak do ta zbuste gjendjen e vështirë ekonomike të banorëve të kësaj ane. Po si nisi e tërë kjo dredhi?
Komuna e Drenasit, me një vendim të saj e kishte dhënë në shfrytëzim pronën e paluajtshme të komunës për një periudhë afatgjate sipas ligjit Nr. 04/L-144 për dhënien e tokave në shfrytëzim.
Përfitues i këtij vendimi ishte kompania BI “Natyra” e cila mori një parcelë prej 20 arësh gjoja për ndërtimin e një hoteli ku do të investoheshin 200 mijë euro dhe ku do hapeshin tetë vende të reja pune.
Por më pas, ka ardhur një propozim-vendim që e njëjta tokë të destinohet për ndërtimin e një kishe protestante në Tërstenik të kësaj komune.
Me datë 23.07. 2014 është bërë anulimi sipas propozim-vendimit të nënparagrafit 10, i paragrafit 1, të nenit 3 të Vendimit 12 nr. 353-31851 mbi dhënien në shfrytëzim afatgjatë të tokave komunale në emër të përfituesit BI “Natyra” me seli në Tërstenik.
Anulimi i pjesshëm i këtij vendimi bëhet me kërkesën e shfrytëzuesit të kësaj paluajtshmerie komunale me të vetmin qëllim që aty të realizohet projekti i Bashkësisë Ungjillore të Mesisë me seli në Prishtinë, e cila ka kërkuar nga Komuna e Drenasit që t’i ndahet një parcelë ndërtimore në Tërstenik, Komuna e Drenasit (Gllogovcit), për ndërtimin e Kishës Protestante me hapësira përcjellëse si për varreza dhe nevoja të tjera të besimtarëve të tyre.
Ata në fakt kanë kërkuar nga autoritetet komunale që t’u jepet në shfrytëzim e gjithë ngastra kadastrale nr. 780-0 në sipërfaqe prej 00.90,00 ha tokë, në vendin e quajtur “Llazina” në zonën kadastrale Tërstenik. Kështu thuhet në propozim-vendimin e Komunës së Drenasit, kopjet e të cilit i ka portali tesheshi.com.
Po ashtu, në këtë propozim-vendim thuhet që Drejtorati për Gjeodezi pranë kësaj Komune obligohet që pas hyrjes në fuqi ta bëjë çregjistrimin e paluajtshmërisë, sipas pikës 1 të këtij vendimi nga përfituesi në emër të Komunës në regjistrin kadastral të komunës dhe që kryetari i komunës ta formojë komisionin për pranim-dorëzim të paluajtshmërisë që është objekt anulimi.
Lufta i nxorri të dërrmuar drenicarët, ndërsa tani në kohë paqeje ata po përballen me fenomene të reja të natyrës fetare të cilat fare lehtë mund të mbjellin farën e përçarjes në mesin e tyre.
Andaj shtrohet pyetja” përse pikërisht Drenica është zgjedhur terren për eksperimente të tilla?! /tesheshi.com/
