Ndërsa qytetarët bëhen gati të shënojnë Kurban Bajramin, therja e kafshëve do të bëhet vetëm në tregun e përcaktuar nga komuna e Prishtinës, e cila thotë se e ka marrë këtë vendim pasi tregu që ndodhet në Kodrën e Trimave është i vetmi që plotëson kushtet higjieno-sanitare.
Sipas vendimit të komunës, të gjithë qytetarët e Prishtinës të cilët planifikojnë që për festën e Kurban Bajramit të presin kurban, mund ta bëjnë këtë vetëm në tregun e kafshëve dhe në asnjë nga tregjet e tjera të qytetit.
Për të zbatuar vendimin, komuna do të nxjerrë në terren inspektorët e saj për të mbikqyrur tregjet e qytetit. Personat që gjenden në shkelje të vendimit, sipas komunës, do të procedohen për kundravajtje.
“Çfarëdo tentimi që prerja e kurbanit të bëhet në lokacione të tjera, si p.sh. tregu i Gjelbër, ai i Ulpianës apo vende të tjera, do të pamundësohet dhe do të iniciohet procedura për kundërvajtje”, thuhet në njoftimin e komunës së Prishtinës. /tesheshi.com/
