Pas datës 30 shtator, blerjet e energjisë elektrike do të bëhen vetëm online. Në këto kushte, OSHEE brenda kësaj date duhet të bëjë gati platformën që do të mundësojë një shërbim të tillë. Vendimi i marrë nga Enti Rregullator i Energjisë rreth një vit më parë detyronte OSHEE të aplikonte për blerje online të energjisë me qëllim uljen e kostove. Por afatet e vendosura nga ERE nuk janë respektuar, ndërsa nga operatori janë aplikuar ankandet me negocim.
OSHEE sh.a. ka raportuar në Entin rregullator se grupi i punës është ngritur me qëllim krijimin e platformës online për blerjen online të energjisë elektrike dhe është hapur procedura me objekt “ ndërtimi i platformës elektronike të publikimit të të dhënave të blerësit dhe shitësit në funksion të blerjes/shitjes së energjisë elektrike.
Ekonomizimi i blerjes së energjisë bëhet i domosdoshëm në këtë periudhë kur kriza e prodhimit të energjisë ka rritur shpenzimet për import. Sasitë e mëdha të prokurimeve të energjisë jashtë vendit dhe në situatë emergjence kanë bërë që çmimet e importit të energjisë të jenë disa raste më të larta se në bursat rajonale, shkruan Monitor.
Rregullorja e ERE e miratuar qysh vitin e kaluar kërkon krijimin e një platformë IT online që duhet të përdoret nga OSHEE për të gjitha ndërveprimet me tregtarët e Energjisë Elektrike në procesin e blerjes.
Kjo platformë duhet të jetë e aksesueshme për përdoruesit online. OSHEE duhet të drejtojë kalendarin e ofertave dhe regjistrin e tregtarëve të energjisë elektrike. Të gjitha ofertat, koha e paraqitjes dhe detajet e ofertës duhet të ruhen në sistem për një afat 5 vjeçar.
Paraqitja e ofertave nga tregtarët e Energjisë Elektrike, bëhet online në sistem sipas një hyrje të paracaktuar në ditën e paraqitjes së ofertave. Koha e hapjes dhe e mbylljes duhet të publikohen në Kalendarin e Ofertave.
Sipas rregullores së tregtimit online, shqyrtimi i plotësimit të ofertave dhe vlerësimi i tyre, duhet të bëhet në mënyrë automatike. Rezultatet e procedurave të tenderimit duhet të paraqiten në mënyrë automatike në ERE për shqyrtim dhe duhet të përmbajnë tregtarët e Energjisë Elektrike, të cilët kanë paraqitur ofertat, të gjithë informacionin në dispozicion dhe ofertat e përzgjedhura. Gjithashtu OSHEE nëpërmjet sistemit online të IT duhet të publikojë rezultatet e blerjes në mënyrë anonime dhe të grumbulluar, me çmime mesatare dhe sasitë e blera për procedurat e blerjes.
Importi i energjisë ka kushtuar dy muajt e fundit rreth 54 milionë euro. /tesheshi.com/
