Kryeminsitri i Kosovës Albin Kurti kumtoi në mbrëmje heqjen e taksës 100 përqind ndaj Serbisë, por duke përfshirë vetëm lëndën e parë të importuar në Kosovë prej saj.
“Pas leximit të analizës mbi reciprocitetin e munguar me Serbinë, e punuar kjo nga Ministria e Ekonomisë, Punësisë kam ardhur tek ky qëndrim sa i përket rrugës përpara lidhur me tarifën 100%.
Si Qeveri e Kosovës gjatë javës së ardhshme do të marrim vendim që nga data 15 mars 2020 të hiqet tarifa për lëndën e parë që importohet nga Serbia dhe Bosnja e Hercegovina.
Kjo si shenjë e vullnetit të mirë dhe gatishmërisë sonë për fillim të zgjidhjes së mirëfilltë të mosmarrëveshjeve ekonomike tregtare dhe politike me Serbinë”.
Ftojmë Serbinë që si përgjigjie ndaj këtij vendimi ndaj palës kosovare, të zotohet se do ta ndërpres fushatën për çnjohje ndaj Pavarësisë së Kosovës, dhe të nis me eliminimin e barrierave tregtare jotarifore ndaj Kosovës”, tha Kurti.
”Nëse pala serbe dëshmon përkushtim të mirëfilltë në ndalimin e fushatës jomiqësore dhe zotohet për heqje të shpejtë të barrierave jotarifore me Kosovën, duke filluar nga data 1 prill 2020, Qeveria e Kosovës do të heqë tërësisht tarifën për importet nga Serbia dhe Bosnja e Herzegovina për një periudhë 90-të ditësh”, ishte kushti tjetër i Kurtit.
Ndërkohë, pas këtij vendimi, ai i kërkoi Brukselit liberalizimin e vizave.
”Bashkimi Europian ta vlerësojë lartë vendimin e palës kosovare për të hequr tarifën 100% duke ofruar liberalizimin e vizave për kosovarët para Samitit të Zagrebit më 7 maj 2020″.
Më tej, ai i kujtoi Serbisë se në rast mosreflektimi, gjithçka do kthehet si më parë.
“Në rast se Serbia nuk e përfill vullnetin e mirë të Qeverisë së Kosovës për eliminimin e barrierave tregtare ekonomike dhe për pasojë nuk e pushon fushatën jomiqësore në rrafshin ndërkombëtar dhe nuk fillon në heqjen e barrierave në marrëdhëniet me Kosovën, atëherë Kosova nga data 1 prill do të nisë me implementimin gradual të principit të reciprocitetit, njëherë në fushën e tregëtisë, e më pas në fushën ekonomike e politike.
Nëse pala serbe nuk reflekton as në periudhën prej 90 ditësh nga vendimi fillestar për heqjen e tarifës së lëndës së parë, atëherë Qeveria e Kosovës më 15 qershor do ta rikthejë tarifën për importet nga Serbia teksa vazhdohet implementimi i filluar i reciprocitetit”, theksoi Kurti.
Ky vendim vjen pas një presioni të fortë ndërkombëtar, sidomos amerikan, por dhe nga partneri në koalicion LDK. /tesheshi.com/
