Sllovenia ka vendosur t’i bashkohet zyrtarisht procedurave para Gjykatës Ndërkombëtare të Drejtësisë (ICJ), duke kërkuar një opinion këshillues mbi politikat e Izraelit në Rripin e Gazës, Jerusalemin Lindor dhe Bregun Perëndimor – një kërkesë që i paraprin akuzave për gjenocid të Afrikës së Jugut të paraqitura në gjykatë javën e kaluar.
Asambleja e Përgjithshme e OKB-së votoi në dhjetor 2022 për t’i kërkuar Gjykatës Ndërkombëtare të Drejtësisë, organit kryesor të OKB-së, të lëshojë një opinion këshillues nëse politikat e Izraelit në këto territore shkelin ligjin ndërkombëtar, sipas Times of Israel.
Ministrja e Punëve të Jashtme Tanja Fajon njoftoi javën e kaluar se Sllovenia vendosi “të marrë pjesë aktive” në këtë procedurë për shkak të konfliktit aktual në Gaza dhe situatës në Bregun Perëndimor.
Gjykata do të shqyrtojë “shkeljen e vazhdueshme të Izraelit të së drejtës së popullit palestinez për vetëvendosje, nga pushtimi i zgjatur, vendbanimi dhe aneksimi i territorit të pushtuar palestinez që nga viti 1967″ si dhe politikat në Jerusalemin Lindor dhe “legjislacioni i pretenduar diskriminues”.
Vendimi i Sllovenisë për të marrë pjesë në propozim do t’i japë asaj mundësinë për të paraqitur një qëndrim me shkrim për çështjet e ngritura nga kërkesa e Asamblesë së Përgjithshme të OKB-së.
“Bëhet fjalë për një gamë shumë të gjerë shkeljesh të supozuara që janë bërë në rajon prej dekadash dhe pasojat e tmerrshme të të cilave janë ende të dukshme edhe sot”, tha Tanja Fajon.
Ajo tha se “Sllovenia vazhdimisht ka kërkuar sanksione shtesë kundër Hamasit dhe kolonëve të dhunshëm izraelitë në Bregun Perëndimor, si dhe për vendosjen e një armëpushimi të përhershëm në Gaza, akses të pakufizuar humanitar dhe fillimin e hershëm të procesit të paqes për zgjidhje me dy shtete”, shtoi ajo.
Seanca e parë për këtë çështje është caktuar për më 19 shkurt.
Disa vende të tjera kanë paraqitur tashmë komente me shkrim për kërkesën e Asamblesë së Përgjithshme të OKB-së, duke përfshirë Jordaninë, Katarin, Belizen, Bangladeshin, Indonezinë dhe Egjiptin.
Sllovenia është vendi i parë evropian që e bën këtë. /tesheshi.com/
