Qeveria holandeze e djathtë vendosi t’i kthejë premtimet në veprime, ndaj filloi të marrë masa drastike që duhet të “vinin rregull” në migrim. Gjithçka ka të bëjë me kufizimin e popullsisë, ndaj dhe Komisioni Kombëtar për Zhvillimin Demografik ka rekomanduar që numri i synuar duhet të jetë më pak se 20 milionë deri në vitin 2050.
Kjo do të thotë se vendi, i cili tani ka një popullsi prej rreth 18 milionë banorësh, nuk duhet të shohë një rritje prej më shumë se dy milionë në 25 vitet e ardhshme, raporton Dutch News.
Sipas të dhënave të Agjencisë Kombëtare të Statistikave, numri i banorëve u rrit me gati 40 mijë në gjashtë muajt e parë të këtij viti, gjë që sugjeron se pa masa të reja dhe me ritmin aktual të rritjes, mund të ketë një rritje me saktësisht dy milion në gjysmë shekulli.
Megjithatë, të djathtët paralajmërojnë se rritja e këtij viti është një e treta më e ulët se një vit më parë, që vjen si rezultat i një numri të ulët emigrantësh dhe më shumë vdekjeve. Ata kanë frikë se një valë e re emigrantësh, e nxitur nga konflikti në rritje në Siri, mund të rrisë ndjeshëm numrin e emigrantëve dhe të krijojë presione shtesë në shërbimet sociale dhe publike.
Kjo është arsyeja pse qeveria, e udhëhequr nga kryeministri Dick Schoof dhe lideri i Partisë së Lirisë së ekstremit të djathtë, Geert Wilders, ka vendosur që nga e hëna e ardhshme, 9 dhjetor, të forcojë kontrollet kufitare, të kufizojë lejet e azilit në tre vjet dhe të reduktojë mundësitë e bashkimit familjar për ata që iu është dhënë e drejta për të qëndruar në vend.
Vendimi vjen pasi komisioni tha në fillim të këtij viti se rritja e moderuar do të ishte alternativa më e mirë për zhvillimin ekonomik, por ministrja e Emigracionit Marjolein Faber dhe ministri i Punës dhe Politikës Sociale Eddy van Huyjum paralajmëruan se edhe rritja e moderuar mund të ketë pasoja negative për shërbimet publike. Kjo mund të përfshijë rritjen e presionit mbi sistemet shëndetësore, arsimore dhe të kujdesit social pasi më shumë njerëz do të kenë nevojë për mbështetje dhe burime.
Në fund, qeveria ra dakord të mbështeste këtë plan, por ministrat theksuan nevojën për kërkime të mëtejshme mbi metodat e kontrollit të imigracionit. Faber tashmë i ka kërkuar policisë ushtarake që të nisë përgatitjet për rritjen e kontrolleve kufitare. “Me Gjermaninë po flasim për bashkëpunim”, shkroi ajo në rrjetet sociale.
Statistikat dhe ekonomistët paralajmërojnë se Holanda ka nevojë për punëtorë të huaj për të plotësuar mungesën e fuqisë punëtore. Sipas një organi këshillimor qeveritar, tre milionë emigrantë të tjerë do të nevojiten deri në vitin 2040 për të ruajtur fuqinë punëtore dhe të ardhurat nga taksat, por ata besojnë se kjo është joreale për momentin. Gjithashtu, për të përballuar problemet si plakja e popullsisë, ministrat propozuan që banorët holandezë të përfshihen më shumë në tregun e punës ose të dalin në pension sa më vonë të jetë e mundur. /tesheshi.com/
