Kryeministri Kurti po qëndron në Sarajevë, ku ka mbërritur me ftesë të një organizate joqeveritare – Shoqata e Intelektualëve të Pavarur Krug 99.
Edhe pse nuk ishte një vizitë zyrtare, Kurti u prit nga dy anëtarë të Presidencës së Bosnje-Hercegovinës, Denis Beqiroviç dhe Zheljko Komshiç, si dhe kryeministrja federale Nermin Nikshiç.
Kurti tha se Kosova dhe Bosnja duhet të forcohen si shtete dhe të forcojnë marrëdhëniet e tyre në mënyrë që Serbia, ndër të tjera, të mos përsërisë krimet e së kaluarës.
“Serbia mohon gjenocidin në Kosovë, mohon gjenocidin në Bosnje, mohon masakrën në Srebrenicë, masakrën në Reçak, mohon të kaluarën e saj kriminale, duke dëshmuar se do ta përsërisnin atë që bënë po të kishin mundësi. Prandaj është shumë e rëndësishme që t’i forcojmë vendet tona dhe në këtë mënyrë t’i ndihmojmë që të mos përsërisin krimet e tyre”, tha kryeministri i Kosovës.
Ai foli në gjuhën boshnjake dhe e filloi fjalimin e tij duke cituar Alija Izetbegoviçin, ish-presidentin e parë të Presidencës së Republikës së Bosnje dhe Hercegovinës gjatë fundit të Jugosllavisë.
“Bosnja dhe Kosova janë të lidhura përmes një të kaluare të dhimbshme dhe tragjike. Në shumë mënyra, Kosova i ka borxh Bosnjës. Në Bosnje ndërhyrja e NATO-s ka ndodhur pas vitit të katërt të luftës, kurse në Kosovë pas vitit të dytë të luftës”, ka kujtuar Kurti.
Kurti e filloi vizitën e tij duke vizituar memorialin e fëmijëve të vrarë të Sarajevës së rrethuar, për të cilin tha se ishte një vend i trishtimit dhe kujtimit të thellë, transmeton Anadolia.
“E nisa vizitën time në Sarajevë duke vendosur lule në memorialin e fëmijëve të vrarë të Sarajevës së rrethuar, një vend i trishtimit dhe kujtimit të thellë. Gjatë rrethimit të Sarajevës (1992 – 1996), 1601 fëmijë u vranë si pjesë e krimeve më të gjera të kryera nga forcat serbe gjatë luftës në Bosnje. Këto të dhëna tragjike të regjistruara këtu na kujtojnë jetët e humbura të pafajshëm dhe tmerret e shkaktuara mbi civilët”.
Më tej, Kurti tha se Serbia “deklaron se Bosnja mund të jetë një shtet i përkohshëm, se Bosnja do të shpërbëhet. Por më besoni, ata thonë se nga frika se do të shpërbëhen vetë. Pas shpërbërjes së ish-Jugosllavisë, Serbia ka frikë se është radha e saj të shpërbëhet”. /tesheshi.com/
