Me shkak arrestimin e Erjon Veliajt, kryebashkiak i Tiranës dhe një nga politikanët më potentë të PS-së, kryeministri Rama deklamoi fundin e moskomentimit të drejtësisë, pra akteve të SPAK-ut, duke e kontestuar pothuajse tërësisht vendimin për ta burgosur Veliajn në detyrë, me akuza të cilat i krahasoi me një roman.
“Do të krijojmë një opinion të konsoliduar për aktakuzën për të cilën gjykatësi vendosi t’i heqi kokën Bashkisë së Tiranës. Bëhet fjalë për një proces hetimor shumë të çuditshëm, e nisur nga një novelë anonime, dorëzuar në shkurtin e kaluar në SPAK, që ka pjellë një roman prej 400 faqesh. U arrit në pikën që edhe një nënë e një fëmije 6 vjeç të dënohet me arrest shtëpie”, tha Rama në një komunikim direkt me komentuesit në rrjete.
“Kush drejtësi i jep këtij fëmije për të ngrënë? Kemi pasur raste të tjera që janë trajtuar ndryshe. Mungesa e këtij uniformiteti është e një peshe të atillë që nuk duhet folur asnjë fjalë më shumë sot pa kuptuar se cilat janë krimet që pretendohet se janë zbuluar për ta lënë Tiranën pa kryetar bashkie dhe pa gjyq. Flas për krimet e provuara, jo të promovuara nëpër media”, shtoi kryeministri.
Për këtë arsye, Rama theksoi edhe se ka ardhur koha që për drejtësinë e re të shprehen edhe opinionet kritike, pasi, sipas tij, e ka të domosdoshme në këtë fazë.
“Drejtësia e re ka hyrë në një fazë që ka fituar të gjithë besimin e nevojshëm dhe mbështetja jonë do të vazhdojë njësoj. Por, ama nuk ka pse mos të shprehim opinionet tona kritike, që janë të domosdoshme që drejtësia si e pavarur të hetojë e të godasë majtas e djathtas kë konsideron të arsyeshme, por edhe si një drejtësi me standarde europiane. U bë pesë vjet që flasin mbarë e mbrapsht, përveç forcës që qeveris vendin. Heshtja jonë i ka ndihmuar institucionet e reja të drejtësisë deri më sot, kur është e qartë që ajo që i mungon është opinioni kritik. Heshtja jonë është keqkuptuar jo vetëm nga armiqtë e Reformës në Drejtësi. Pritet nga prokurorë e gjykatës një drejtësi gjithmonë e më shumë europiane, prandaj ndarja e opinioneve kritike me publikun është gjëja më e rëndësishme që mund të bëjmë ne”, arsyetoi kryesocialisti e kryeministri. /tesheshi.com/
