Kreu i bashkisë së Tiranës, Erion Veliaj premtoi se nuk do të bëjë diferencime në trajtimin me investime të shkollave në qytet dhe në fshat, duke bërë që fëmijët të kenë të njëjtat kushte. Gjatë inspektimit të shkollës së Shëngjergjit ku po kryhen punime në mjediset sportive, Veliaj tha se 300 fëmijët që studiojnë në këtë shkollë meritojnë të kenë të gjitha kushtet, të njëjtat terrene me cilësi, siç i kanë shkollat në ish Bllok, brenda Unazës së Tiranës apo edhe ato të rejat në zona të tjera.
Veliaj saktësoi rëndësinë që merr bashkëpunimi me qeverinë qendrore si e vetmja garanci, sipas tij, për transformimin e kryeqytetit.
“Njerëzit duhet të kuptojnë se fati i investimeve të bashkisë është i lidhur me atë të qeverisë. Ndaj, në datën 18 qershor do vazhdojmë në të njëjtin drejtim, me Edi Ramën kryeministër dhe me PS-në në krye të punëve të vendit. Ndërsa ne sigurohemi që çdo ditë bëjmë nga një punë konkrete për Tiranën sepse është garancia e vetme se si transformohet i gjithë qyteti”, u shpreh kryebashkiaku Veliaj. /tesheshi.com/
