Klodian Elqeni, i riu që u kthye në hero me aktin e tij në 25 prill duke parandaluar një tragjedi të vërtetë në Sheshin Skënderbej, u nderuar nga kryebashkiaku Veliaj me titullin “Mirënjohja e Qytetit”.
“Mund të kishte ndodhur edhe hataja me aq shumë qytetarë e fëmijë që po loznin, por na shpëtoi Zoti, se ndonjëherë Zoti çon një njeri të mirë që të shpëtojë të tjerët.
Ndaj të falenderoj shumë dhe dua që në emër të qytetit të të jap këtë medalje të mirënjohjes, me shpresë që të kthehet në shembull edhe për të tjerët”, iu drejtua Veliaj të riut.
“Nuk e kisha menduar kurrë! Është diçka vërtet e çuditshme në një kohë kaq të shkurtër për mua, por ndjehem shumë mirë dhe shumë i vlerësuar nga shqiptarët anembanë dhe posaçërisht nga Lali Eri, kryetari ynë dhe nga të gjithë absolutisht. Ju falenderoj shumë të gjithëve,” u shpreh Klodiani Elqeni.
Ky i fundit, në mënyrë shumë kurajoze dhe inteligjente, arriti të neutralizojë një person që, nën efekte drogë, hyri me automjet mes njerëzve në Sheshin Skënderbej. /tesheshi.com/
