Kreu i bashkisë së Tiranës, Erion Veliaj iu kërkoi miqësisht demokratëve në protestë që të zhvendosen me çadrën e tyre nga bulevardi tek lulishtja para Piramidës, me kusht që mos bllokojnë qarkullimin e automjeteve dhe sidomos autobusëve urbanë.
“Jam shpresëplotë që ndoshta do kemi një mirëkuptim edhe nga bllokuesit e Bulevardit që çadra ose të zhvendoset te lulishtja e Piramidës, ose në një hapësirë tjetër, ku të mos bllokohet lëvizja e autobusëve. Kështu, mijëra qytetarë që sot nuk arritën në punë në orar, të mos kthehet në një problem kronik gjatë gjithë kësaj periudhe. Do të respektojmë të drejtën e çdokujt për të protestuar, megjithatë nëse mund të gjejmë një bashkëpunim që kjo të mos bllokojë jetën e përditshme të qytetarëve të Tiranës, që duan të jetojnë me punë, të ndjekin shkollën dhe që duan të vazhdojnë jetën normalisht, besoj se do të arrijmë një konsensus”, theksoi Veliaj.
Por kjo kërkesë e Veliajt është një tjetër tregues që politika shqiptare vepron me dy standarte. Kreu i sotëm Bashkisë ishte 7 vjet më parë pjesë e grevës së urisë së të majtëve, ku po ashtu qarkullimi në bulevard u bllokuar për gati tre javë. Atëherë nuk ndodhi që çadrat e socialistëve të zhvendoseshin tek Lulishtja në krah të Kryeministrisë, për hir të të drejtës së njerëzve për të qarkulluar lirshëm dhe shkuar herët në punë. /tesheshi.com/
