Krahas Pallatit të Sportit “Asllan Rusi”, qyteti i Tiranës do të ketë edhe një pol të dytë elitar për zhvillimin e lojërave profesioniste në Parkun Olimpik.
Vetë kryetari i bashkisë së Tiranës, Erion Veliaj dhe ministrja e Arsimit dhe e Sportit, Lindita Nikolla inspektuan punimet në këtë park, të cilat janë në përfundim të fazës së parë.
Veliaj theksoi rëndësinë e këtij investimi publik, i cili krijon dy pole elitare për ndeshjet e lojërave me dorë që zhvillohen në kryeqytet.
“1350 vetë do të shijojnë pallatin e sportit, i cili kur të inaugurohet në shtator do të mirëpresë të gjitha aktivitetet që sot zhvillohen në pallatin e sportit “Asllan Rusi”. Mandej, në hapësirën e pallatit të sportit do të fillojmë një projekt tjetër për arenën e lojërave me dorë, të basketbollit, të volejbollit të Tiranës. Besoj se Tirana do të ketë dy pole, një pol elitar këtu në Parkun Olimpik dhe një arenë profesioniste për të gjitha ndeshjet që do të zhvillohen në qytetit e Tiranës, atje ku sot është pallati i sportit”, tha Veliaj.
Në vijim ai bëri me dije se Parku Olimpik do të kalojë nën administrimin e Bashkisë së Tiranës.
Nga ana e saj ministrja Nikolla deklaroi se Parku Olimpik vjen si një standard i ri arkitekturor në qendër të Tiranës, një standard i ri në sport, jo vetëm për sportin elitar, por edhe për sportin si një komponent i rëndësishëm edukimi./tesheshi.com/
