Kryebashkiaku i Tiranës, Erion Veliaj ia ka kushtuar një pjesë të mirë të fjalimit të tij inagurues në pazarin e ri, kryeministrit Rama dhe punës si kryebashkiaku, që sipas tij, nisi transformimin e kryeqytetit. Duke iu referuar një artikulli në “The Economist” me titullin “Tirana fluturon lart”, kryebashkiaku Veliaj vendosi shenjën e vazhdimësisë mes punës së Ramës dhe të atij vetë për transformimin e qytetit.
Pas kësaj, Veliaj i është kthyer edhe çadrës së opozitës.
“Komplet për rastësi, edhe sfondi klasik edhe ndoshta peisazhi më i fotografuar i pazarit i ngjan një çadre. Kjo është gjithashtu një çadër, por është një çadër e punës”.
Të njëjtin mendim ndau edhe kryeministri Rama, i cili tha se në çadrën tek Pazari i Ri do të fillojnë punën ata që ushqejnë familjet me punë të ndershme.
Kreu i ekzekutivit tha se opozita i bën thirrje të papunëve të mblidhen për të mbajtur në pushtet gjykatësit dhe prokurorët e korruptuar.
“Si qenkan njësoj, si është njësoj kjo çadër këtu me çadrën atje?! Si janë njësoj?! Ata njerëz të zakonshme që janë brenda dhe që sot fillojnë punë për të ushqyer me punën e tyre të ndershme, në kushte fantastike familjet e tyre dhe ata të tjerë që janë disa metra larg dhe ju thonë të papunëve: Hajdeni mblidhuni me ne që të mbajmë në punë gjykatësit dhe prokurorët e korruptuar”, tha Rama.
Gjithsesi, kryeministri ka shmangur komentet në lidhje me transformimin e Tiranës si në kohën e tij ashtu edhe në atë të Veliajt, edhe pse nuk mbeti pa përmendur edhe në këtë aktivitet se çfarë do të thotë pushtet i votës. Ai akuzoi ish-kryebashkiakun e Tiranës, Lulzim Basha se e kishte kthyer qytetin në një fjetore të madhe ku ndihej vetëm gërhima e tij në zyrën e Bashkisë.
Në krah të kryeministrit, gjatë inagurimit të pazarit të ri, ishte ish-ministri i Brendshëm, Saimir Tahiri, tashmë në ekipin e fushatës së socialistëve në terren. /tesheshi.com/
