Kandidati i Partisë Socialiste për bashkinë e kryeqytetit, Erion Veliaj, i pranishëm në Kombinat, gjatë një takimi elektoral me banorët e zonës, ka ftuar sërish në debat kundërshtarin e tij politik, kandidatin e djathtë për këtë bashki, z. Halim Kosova.
“Sfidoj sërish në debat kryetarin e Bashkisë që të na tregojë se çfarë plani kanë ata. Kishin 4 vjet të merreshin me këtë qytet. Kur ishte hera e parë dhe e fundit që erdhën në lagje për të identifikuar problemet? Nëse kanë një plan më të mirë, le të vinë këtu në lagje ta prezantojnë dhe pastaj të fitojë më i miri”,- tha Veliaj.
Sipas tij, kandidati i djathtë dhe Partia Demokratike momentalisht nuk kanë një plan. Ai shtoi se i vetmi plan që kanë ata është “Hajde kthehemi aty ku ishim”.
“A ka njeri sot që për çështjen e rendit dhe sigurisë në vend do të kthehet aty ku ishim? A ka njeri normal sado i djathtë dhe fanatik të jetë që do të kthehet aty ku ishim? A ka njeri me ndihmë ekonomike që në 2013 nuk e merrte për 6 muaj dhe do të kthehet aty ku ishim? Këta do të hyjnë në histori si e vetmja forcë politike që i thonë publikut ‘Me indjetro ecet përpara”,- u shpreh Erin Veliaj.
Ai ftoi qytetarët që siç janë sot bashkë, në 27 ditët që kanë ngelur të jenë prapë bashkë dhe të votojnë rrugën që çon në drejtimin e duhur në Kombinat.
“Jemi mbi 40 parti që jemi bërë bashkë të çojmë Tiranën në drejtimin e duhur. Kemi miq që vijnë nga e djathta, FRD, që vijnë nga komuniteti çam etj. Nuk ka të majtë dhe të djathtë. Ne kemi një nevojë urgjente që të shkojmë në drejtimin e duhur”,- tha ndër të tjera Erion Veliaj./tesheshi.com/
