Darka e së dielës mes Edi Ramës dhe Ilir Metës pritet që të konkludojë në një marrëveshje të re mes tyre, por kushtet e saj akoma s’janë bërë publike. përtej pazareve mes tyre një gjë tjetër kishte rëndësi; shoqëruesit e dy liderëve. Pse zgjodhën Erion Veliajn dhe Petrit Vasilin?
Kryebashkiaku i Tiranës, Erion Veliaj, një ish-aktivist i shoqërisë civile dhe i rritur në politikë nën bekimin e Edi Ramës, si dhe ministri i Drejtësisë, Petrit Vasili, një ish-mjek i cili qarkullon në politikë si njeriu i besuar i Ilir Metës, janë dy njerëzit e vetëm të cilët kanë parë e dëgjuar se çfarë është thënë në darkën e fundit mes Edi Ramës e Ilir Metës. Kjo darkë pritet me interes dhe kuriozitet nga opinioni publik për shkak të situatës politike ku ndodhet vendi, me opozitën në protestë e cila kërcënon me bojkot të zgjedhjeve. Një marrëveshje e re mes dy aleatëve që “urrehen” ditën për diell dhe gjejnë gjuhën natën, do të jepte përgjigje për shumë pikpyetje aktuale, siçështë ajo nëse LSI do t’i bashkohet opozitës kundër Ramës.
Por përveç vendimeve apo negociatave që janë bërë në këtë tryezë, informale është shumë interesant të dimë se pse Rama dhe Meta zgjodhën pikërisht Veliajn dhe Vasilin në krah të tyre dhe jo për shembull Gramoz Ruçin dhe Spartak Brahon, dy pleqtë e “urtë” të partive respektive.
Veliaj si pasardhës i Ramës
Njeriut të dytë që i intereson bashkëpunimi me LSI-në pas Ramës, është Veliaj. Nëse LSI nga aleate bëhet armike, Veliaj si kryebashkiak do të gjendej para një bllokimi në këshillin bashkika nga këshilltarët e Metës duke e bërë gati të pamundur qeverisjen e tij të mëtejshme në Tiranë.
Nga ana tjetër, ai shihet si pasardhës i Ramës në parti dhe pse tani për tani ka rivalë në këtë rrugëtim. Edhe pse është zgjedhur të drejtojë bashkinë më të madhe në vend në emër të PS-së, ai nuk gëzon reputacion në bazën e kësaj partie. Ai nuk vjen natyrshëm prej kësaj baze, por është i katapultuar nga jashtë, madje nga Mjaft-i një organizatë e urryer nga socialistët pasi shihej si një prej fajtorëve të humbjes së pushtetit më 2005-ën. Edhe si zgjedhje për kryebashkiak ai u është imponuar socialistëve, ndërkohë që Saimir Tahiri, një tjetër politikan i ri që erdhi bashkë me Ramën në PS, ka një lidhje më organike me socialistët e thjeshtë dhe me strukturat e PS-së. Fakti që Rama zgjodhi Veliajn në krahun e tij në një darkë ku vendoseshin fatet e aleancës politike dhe si pasojë dhe të qeverisjes së nesërme tregon shumë… Duke qartë se Rama e shikon Veliajn jo vetëm si pasardhës së tij në bashkinë që e drejtoi vetë për 11 vite, por dhe si pasardhës politik në PS.
Vasili, një kandidat për president?
Vasili, si ministër Drejtësie, nuk kishte ndonjë interes të drejtpërdrejtë në takimin mes aleatëve, por burimet nga LSI flasin për mundësinë e një presidenti të ri nga radhët e LSI-së dhe emri i Vasilit duket se është i pari në radhë. Duke e pasur njeriun e tij të besuar, të cilin e bëri ministër pas skandalit të shkarkimit të Ylli Manjanit, Meta duket se po e projekton mikun e tij edhe për një detyrë më të lartë që do t’i sigurojë kësaj partie të vogël një pushtet më të madh se pesha e saj politike: Presidentin e ri. /tesheshi.com/
