Në një intervistë për agjencinë turke të lajmeve Anadolu Agency, futbollisti kosovar Vedat Muriqi ka sjellë në vëmendje kujtimet e tij të fëmijërisë gjatë luftës së viteve 1998-1999 në Kosovë dhe i ka krahasuar ato me tragjedinë e luftës në Siri.
“Unë mund ta kuptoj më së miri se çfarë po ndodh në Siri. Ata janë në një situatë shumë më të tmerrshme nga ç’ishim ne,” thotë sulmuesi 22-vjeçar që luan për Gençlerbirliginë në kampionatin turk.
Muriqi ka rrëfyer për kalvarin e vuajtjeve gjatë luftës së Kosovës, kur ai ishte fëmijë. Ai thotë se i kujtohet kur së bashku me prindërit kishte braktisur shtëpinë për të emigruar në një vend tjetër.
“Fillimisht kemi qëndruar në një shtëpi me 50-55 njerëz, por pasi kemi emigruar kemi ndarë një dhomë të vetme me 50-55 njerëz. Në fakt ishte një bodrum për pije, ku qëndruam për dy ditë,” ka thënë Muriqi.
“Kemi pasur në dispozicion dy litra qumësht çdo ditë për 50 persona. Ne ishim fëmijë, dhe kur pyesnim për ushqim, nënat tona qanin, sepse nuk kishin asgjë për të na dhënë,” ka shtuar ai.
Siria është përfshirë në një luftë civile shkatërrimtare që në fillim të vitit 2011, kur regjimi i Beshar Esadit reagoi ashpërsisht ndaj protestave që shpërthyen si pjesë e kryengritjeve të Pranverës Arabe.
Që atëherë, më shumë se një çerek milion njerëz janë vrarë, e më shumë se dhjetë milionë janë zhvendosur në gjithë vendin e shkatërruar nga lufta, sipas OKB-së. /tesheshi.com/
