Vdekja e një emigranti shqiptar në Greqi, po merr përmasat e një incidenti që po provokon një krizë në raportet mes Shqipërisë dhe Greqisë. Edhe pse çështja nuk ka shkuar deri në nivele të larta qeverisëse, ajo ka arritur të hapë debat politik. Së fundi, opozita i kërkoi kryeministrit Rama që të angazhohet në zbardhjen e vdekjes së Pëllumb Marnikollajt, lezhianit që humbi jetën në një komsiariat të policisë në kryeyqtetin Athinë.
Ka reaguar gjithashtu edhe Avokati i Popullit, ndërsa familja e tij ka bërë kallzëim penal nga autoriteteve greke. Për ngjarjen është deklaruar gjithashtu edhe ambasadori shqiptar në Greqi, Dashnor Dervishi. Ky i fundit i tha Top Channel “se menjëherë pala shqiptare është vënë në kontakte me policinë greke për të marrë më shumë informacione lidhur me atë çfarë i ka ndodhur 29-vjeçarit shqiptar.”
Dervishi citohet të ketë thënë se e gjithë skena është filmuar nga një kamera sigurise që ndodhet në dhomën ku ka ndodhur ngjarja, pamjet e të cilës ata ia kanë kërkuar autoriteteve greke, por që u është thënë se do t’u vihen në dispozicion në një moment tjetër, pasi ngjarja është ende në hetim.”
Pala greke pretendon se shqiptari është vetëhedhur nga lartësia, ndërsa familjarët thonë se ai është keqtrajtuar, derisa i ka ardhur dhe vdekja. /tesheshi.com/
