Vatikani u bëri thirrje qeverive që të monitorojnë me kujdes zhvillimin e inteligjencës artificiale (AI), duke paralajmëruar “hijen e së keqes” në aftësinë e saj për të përhapur informacione të rreme.
“Mediat e rreme të krijuara nga inteligjenca artificiale mund të minojnë gradualisht themelet e shoqërisë”, thotë një dokument i ri etik mbi inteligjencën artificiale, i hartuar nga dy ministri të Vatikanit dhe i miratuar nga Papa Françesku.
“Kjo çështje kërkon rregullim të kujdesshëm, pasi dezinformimi — veçanërisht nëpërmjet mediave të kontrolluara ose të ndikuara nga inteligjenca artificiale — mund të përhapet pa dashje, duke nxitur polarizimin politik dhe trazirat sociale,” vëren teksti.
Papa Françesku, kreu i Kishës Katolike me rreth 1.4 miliardë besimtarë që nga viti 2013, e ka përqendruar vëmendjen e tij në çështjet etike që lidhen me inteligjencën artificiale vitet e fundit.
Javën e kaluar, Papa dërgoi një mesazh për AI në Forumin Ekonomik Botëror në Davos, duke paralajmëruar udhëheqësit politikë, ekonomikë dhe të biznesit se teknologjia ngre “shqetësime kritike” për të ardhmen e njerëzimit.
Papa foli gjithashtu për teknologjinë në samitin e G7 në Itali në qershor, duke vënë në dukje se njerëzit nuk duhet të lejojnë që algoritmet të vendosin për fatin e tyre.
Vatikani, thirrje për “hijen e së keqes”
Dokumenti i ri i Vatikanit, i titulluar “Antica et Nova” (I lashtë dhe i Ri), shqyrton ndikimin e inteligjencës artificiale në një sërë sektorësh, duke përfshirë tregun e punës, shëndetin dhe arsimin. /tesheshi.com/
