U varros sot me nderime në Prishtinë, Mahmud Arnauti, djali i një prej dijetarëve shqiptarë më të mëdhenj të Islamit, Shehj Abdulkadër Arnauti. I ndjeri i përkiste një familjeje kosovare që u zhvendos në Siri shumë vite më parë, ku babai i tij arriti të shënonte emrin në librin e artë të dijetarëve të Shamit të kohëve moderne, së bashku me Shehj Albanin, ky i fundit me origjinë nga Shqipëria. Vetë ai lindi në Damasak në vitin 1954.
Mahmud Arnauti njihej si një ndër studiuesit më në zë të trashëgimisë botërore islame duke lënë mbi 80 vepra si bashkëautor, ku veçohen shumë enciklopedi islame të botuara në shumë vende të botës.
5 vite më parë themeloi në Kosovë një qendër me emrin e babait të tij, ku dhe jetoi derisa vdiq, dy ditë më parë, në moshën 63-vjeçare, si pasojë e një ataku kardiak. Varrimi i tij në tokën e Kosovës, është mjaft kuptimplotë. I ndjeri ishte mjaft i lidhur me origjinën e tij dhe me gjuhën gjithashtu, shqipen. Edhe pse i lindur dhe i rritur në Siri, ai, identitetin shqiptar të një kosovari, e pati pjesë qenësore përgjatë jetës. /tesheshi.com/
